Përshëndet rezolutën e PE, PD: Për çeljen e negociatave, Shqipëria ka nevojë për një qeveri të re!
Partia Demokratike përmes Sekretarit të Përgjithshëm, Gazment Bardhi, ka përshëndetur miratimin e rezolutës në Parlamentin Europian, e cila fton vendet anëtare të Bashkimit Evropian të marrin një vendim pozitiv për çeljen e negociatave me Shqipërinë dhe Maqedoninë e Veriut, duke shtuar se pa humbur asnjë minutë kohë, Shqipëria ka nevojë për një Qeveri të dalë nga zgjedhje të lira e të ndershme në mënyrë që të plotësojë të gjitha kushtet për të mos marrë refuzimin e rradhës.
“Shqipëria është me fat që ka kaq shumë miq dhe mbështetje në rrugën e integrimit europian! Mirënjohje për mbështetjen e sotme të Parlamentit Europian! Ky është një tjetër mesazh i qartë se Europa e konsideron Shqipërinë pjesë të saj,” thekson Gazment Bardhi përmes rrjetit social Facebook duke theksuar se tashmë është detyra e Shqipërisë që, pa humbur asnjë minutë kohë, të plotësojë të gjitha kushtet për të mos marrë refuzimin e rradhës.
“Shqipëria ka nevojë për një Qeveri të dalë nga zgjedhje të lira e të ndershme, që e ka prioritet integrimin europian, që është e sinqertë me partnerët europianë dhe nuk tenton tu hedh hi syve për plotësimin e 9 kushteve dhe që punon për shqiptarët dhe Shqipërinë si gjithë Europa.”
1. Funksionimi i Gjykatës së Lartë dhe Gjykatës Kushtetuese.
2. Miratimi i Reformës Zgjedhore me pjesëmarrjen e të gjitha forcave politike.
3. Zbatimi i Reformës Zgjedhore.
4. Ndjekja penale e akuzave për shitblerjen e votave.
5. Funksionimi i Prokurorisë Speciale për Luftën ndaj Korrupsionit (SPAK).
6. Rezultate në luftën ndaj korrupsionit dhe krimit të organizuar, përfshirë edhe ndjekja penale e zyrtarëve të nivelit të lartë.
7. Përparime në Reformën e Administratës Publike dhe ndëshkimi i zyrtarëve të lartë që kanë shkelur ligjin.
8. Ndjekja penale e gjyqtarëve dhe e prokurorëve që nuk e kanë kaluar provimin e Vettingut.
9. Sqarimi përfundimtar i ligjshmërisë së zgjedhjeve lokale të 30 qershorit 2019 dhe përsëritja e tyre në përputhje me reformën zgjedhore, me vendim të Gjykatës Kushtetuese të Shqipërisë.
Pra, një Qeveri e re e dalë nga zgjedhje të lira e të ndershme sepse Rruga e Shqipërisë për hapjen e negociatave kalon nga këto 9 kushtet e Gjermanisë, thekson Partia Demokratike, duke e bërë të qart se Edi Rama është pengesë për plotësimin e këtyre kushteve ndërsa përfundon:
“Edi Ramës i mungon dëshira dhe vullneti për progresin e Shqipërisë, prandaj u refuzua sërish nga BE. Shqipëria nuk mund të jetë më peng i dështimit dhe mashtrimeve të një njeriu.”
