Përshkallëzohet situata në Hong Kong
Policia e Hong Kongut është përplasur edhe një herë me protestuesit anti-qeveritar, përderisa vendi hyn në javën e 10-të të demonstratave masive dhe trazirave.
Policia hodhi gaz lotsjellës në të gjithë Hong Kongun, duke përfshirë një stacion hekurudhor të mbyllur, rapoton RFE.
Në rrethin Wan Chai, bomba benzine dhe tulla u hodhën mbi policinë nga ana e protestuesve.
Një numër protestuesish, përfshirë një polic, u plagosën gjatë përleshjeve.
Policia gjithashtu u filmua duke shkrepur plumba gome në një distancë të afërt brenda një stacioni të metrosë, ndërsa oficerët e tjerë u panë duke rrahur njerëz me shkopinj në shkallët lëvizëse.
Pse po protestohet në Hong Kong?
Hong Hongu është përfshirë nga trazirat dhe dhuna tash e dy muaj. Protestat nisën për të kundërshtuar një projektligj që lejonte ekstradimin e banorëve të Hong Kongut në Kinë.
Kritikët thanë se kjo do të dëmtonte liritë ligjore të Hong Kongut dhe mund të përdoret për të heshtur kritikët.
Edhe pse qeveria tani e ka pezulluar projektligjin, i cili do të lejonte ekstradimet në territorin e Kinës, demonstruesit duan që ai të tërhiqet plotësisht.
Kërkesat e tyre janë zgjeruar, duke përfshirë thirrjet për më shumë demokraci, dhe dorëheqjen e udhëheqëses Carrie Lam.
Pse situata në Hong Kong po cenon raportet Kinë-SHBA?
Ditë më parë, Shtetet e Bashkuara dhe Kina kanë shkëmbyer fyerje ndaj njëra-tjetrës, për shkak të situatës në Hong Kong.
SHBA-ja e quajti Kinën një “regjim të dhunshëm” pasi një gazetë shtetërore kineze, publikoi emrin dhe foton e një diplomati amerikan, duke folur me aktivistët në Hong Kong.
Kina i ka hedhur poshtë sulmet si “logjikë të bandave” dhe e ka akuzuar vazhdimisht SHBA-në për ndërhyrje në Hong Kong.
Cili është statusi i Hong Kongut?
Hong Kongu është pjesë e Kinës, por qytetarët e saj kanë më shumë autonomi sesa ata në pjesën tjetër të Kinës.
Pekini është shumë i ndjeshëm në lidhje me statusin e Hong Kongut dhe me çdo thirrje për më shumë autonomi nga Kina.
Ish-kolonia britanike është kthyer Kinës në vitin 1997 me kusht që të mbajë “një shkallë të lartë të autonomisë” për 50 vjet.
