Personi më i moshuar në Evropë mposht koronavirusin

Personi më i moshuar në Evropë, murgesha franceze, Andre, ka mposhtur koronavirusin, dhe të enjten do të festojë ditëlindjen e saj të 117-të.

Lucile Randon, që ka marrë emrin Motra Andre kur i është bashkuar rregullit katolik më 1944, ka rezultuar pozitive në testet për koronavirus në një shtëpi për kujdes të të moshuarve në Toulon në jug të Francës, më 16 janar.

Ajo ka qenë e izoluar nga banorët tjerë, mirëpo nuk ka shfaqur simptoma.

E pyetur nëse ka qenë e frikësuar që është infektuar, Motra Andre tha për televizionin francez, BFM se nuk ishte frikësuar se mund të vdesë.

“Jam e lumtur që jam me ju, mirëpo do të doja të isha diku tjetër – t’iu bashkohesha vëllait, gjyshit dhe gjyshes”.

Zëdhënësi për shtëpinë ku jeton ajo, David Tavella, tha se ajo është mirë me shëndet.

“Ne konsiderojmë se ajo është shëruar. Ajo është e qetë dhe mezi po pret të festojë ditëlindjen e saj të 117-të këtë të enjte,” tha Tavella duke shtuar se Motra Andre, e cila është e verbër, do të festojë ditëlindjen e saj me një grup të vogël të banorëve, për dallim nga e kaluara, meqë ekziston rreziku për infektim nga koronavirusi ndërsa përfundoi:

“Ajo ka qenë shumë me fat!”

Motra Andre, raporton RFE, e cila ka lindur më 11 shkurt të vitit 1904, është gruaja e dytë më e moshuar në botë.

Gruaja më e vjetër në botë është japonezja, Kane Tanaka, e cila ka festuar ditëlindjen e 118-të më 2 janar.