Përvjetori i Masakrës Rahovecit, Presidentja Osmani: Thirrje për drejtësi!

Duke përkujtuar përvjetorin e Masakrës së Rahovecit, Presidentja e Kosovës, Vjosa Osmani, tha se sot nuk është vetëm mundësi për ta kujtuar këtë ditë të trishtë dhe për t`i nderuar viktimat, por mbi të gjitha është thirrje për drejtësi.

“Përkujtimi i sotëm nuk është vetëm një mundësi për ta kujtuar këtë ditë të trishtë, për ta kujtuar të kaluarën dhe për t`i nderuar viktimat, por mbi të gjitha është thirrje për drejtësi.

Kujtimi për jetët e humbura e të pafajshme do të jetë i përhershëm, teksa zëri ynë për drejtësi do të kumbojë, deri në triumfin e saj!” tha Presidentja e Kosovës, Vjosa Osmani në përvjetorin e vrasjes mizore të 150 grave, fëmijëve dhe pleqëve shqiptarë nga forcat ushtarako-policore serbe të Milosheviçit në Rahovec.

Ndryshe, më 19 korrik të vitit 1998, forcat e regjimit gjenocidal të Serbisë vranë mizorisht afro 150 gra, fëmijë e pleq, të strehuar në Teqen e Sheh Myhedinit në Rahovec, sikurse edhe në vendin e quajtur “Tuma”.