Përvjetori i vrasjes së Azem Hajdarit, Berisha: Frymëzim për protesta, për rrëzimin e regjimt!

Duke vlerësuar figurën e heroit të demokracisë, Azem Hajdari, në 24 vjetorin e vrasjes, Kryetari i Partisë Demokratike, Sali Berisha, bëri thirrje për t’u ngritur ndaj këtij regjimi dhe protestuar si studentët në vitet ’90.

“Azem Hajdari guxoi të dalë në një protestë të fuqishme me studentët, të vendoset në mënyrë epike në krye të kësaj lëvizjeje, e cila solli gjunjëzimin e regjimit dhe vendosjen e pluralizmit politik në Shqipëri. Me këtë akt Azem Hajdari dhe bashkëluftëtarët e tij ndanë epokën e monizmit me epokën e pluralizmit. Për këtë akt Azem Hajdari u ekzekutua më 12 shtator 1998 nga përfaqësues kriminelë, vrasës me uniformë,” tha Sali Berisha duke shtuar se ai është dhe mbetet frymëzim i madh për shqiptarët.”

“Në këtë kontekst vepra e Azem Hajdarit është një frymëzim i madh për shqiptarët për t’u ngritur fuqishëm në protesta dhe demonstrata dhe për të rrëzuar këtë regjim i cili qëndron mbi votën e vjedhur të shqiptarëve,” tha Kryetari i PD, Sali Berisha duke përfunduar:

“Ndaj është një rast që t’u bëj thirrje shqiptarëve, të përmbushim misionin tonë, siç e përmbushën Azem Hajdari dhe studentët në vitet ’90!”