Pesëshja e Madhe në Kosovë, takim me Kryeministrin Albin Kurti
I dërguari i Shteteve të Bashkuara për Ballkanin Perëndimor, Gabriel Escobar, Përfaqësuesi special i Bashkimit Evropian për dialogun, Miroslav Lajçak, dhe Përfaqësuesit e Gjermanisë, Francës e Italisë, zbarkuan sot në Prishtinë ku filluan një takim me Kryeministrin e Kosovës, Albin Kurti, për të vazhduar më pas rrugën drejt Beogradit për të takuar Presidentin e Serbisë, Aleksandar Vuçiç, në përpjekje për të rinisur dialogun Kosovë-Serbisë pas agresionit serb të 24 shtatorit ku mbeti i vrarë polici Afrim Bunajku.
Pesëshja ndërkombëtarë gjithashtu pritet të shtyjë përpara dhe zbatimin e Marrëveshjes për normalizim, por edhe zbatimin e të gjitha marrëveshjeve që kanë arritur Kosova e Serbia ndër vite.
Në Samitin SHBA-BE i cili u zhvillua dje në Washington, iu bë thirrje palëve të zbatojnë “shpejtë dhe pa kushte” Marrëveshjen për normalizim të marrëdhënieve mes Kosovës dhe Serbisë, dhe që dy vendet t’i kthehen dialogut.
“Nënvizojmë nevojën që Kosova dhe Serbia, urgjentisht t’i ulin tensionet dhe shpejt, e pa kushte ta zbatojnë Marrëveshjen për rrugën drejt normalizimit të raporteve mes tyre dhe të kthehen në dialogun e lehtësuar nga BE-ja,“ thuhet në deklaratën e miratuar.
Ndërkohë po dje Kryeministri Albin Kurti tha se nuk mund të ketë normalizim të raporteve me Serbinë, pa pasur siguri në Kosovë.
“Çka do të kërkojnë dhe çfarë do të ofrojnë e marrim vesh në takim. Unë mund të them, se nuk mund të kemi normalizim pa siguri dhe siguria e Kosovës duhet të jetë prioritet, edhe për institucionet e shtetit, për popullin dhe shoqërinë,”ishte i prerë Albin Kurti.
Nga BE u shprehën se qëllimi kryesor i vizitës në Kosovë dhe Serbi është ringjallja e dialogut, me synim që palët të zbatojnë obligimet që dalin nga marrëveshjet e arritura.
Ndryshe vizita e pesë të dërguarve, është e para në Kosovë që nga sulmi i 24 shtatorit kundër policisë në Banjskë të Zveçanit, ku mbeti i vrarë një polic dhe dy të tjerë u plagosën. Përgjegjësinë për organizimin e sulmit e mori Millan Radoiçiq, ish-nënkryetari i Listës Serbe dhe bashkëpunëtor i presidentit serb, Vuçiq.
Pesëshja ndërkombëtare zhvilloi takimin e fundit më 20 Janar në prag të raundit të rradhës, dhe temë e bisedimeve ishte plani franko-gjerman, për të cilin më vonë u arritë dhe Marrëveshja në Ohër.
Së bashku me të dërguarin Escobar dhe Lajçak, në takimet që do zhvillohen në Prishtinë dhe Beograd do jenë Këshilltari për siguri dhe politikë të jashtme i presidentit të Francës, Emanuel Bonne, Këshilltari i kancelarit gjerman, Jens Plotner, dhe Këshilltari i Kryeministres së Italisë, Francesco Talo.
