Pesëshja me Kurtin, Lajçak: Pa themelimin e Asociacionit nuk ka progres të Kosovës në BE

Pas takimit të pesë të dërguarve amerikano-evropianë me Kryeministrin e Kosovës, Albin Kurti, Përfaqësuesi i Posaçëm i Bashkimit Evropian për dialogun, Miroslav Lajçak, bëri të të ditur atë që u kërkua nga Kosova dhe shqiptarëy e kanë dëgjuar nga goja e Presidentit të Serbisë të përsëritet si në takim me Escobarin dhe Borrelin ashtu dhe Putinin dhe Ambasadorin e Palestinës në Beograd: Themelimin pa vonesë të Asociacionit të komunave me shumicë serbe!

Ndryshimi i vetëm sot ishte se Miroslav Lajçak shtoi se pa Asociacion, Kosova nuk do të ketë progres në rrugën evropiane.

“Kurti ka përgjegjësi të bëjë progres në normalizim, nëse Kosova dëshiron të bëjë progres në BE. Duhet ta përsëris që Asociacioni të formohet pa vonesa. Pa këtë nuk të ketë progres të Kosovës në integrimin evropian. E vlerësojmë gatishmërinë e Kryeministrit Kurti për të vazhduar diskutimet. Tani do ta vazhdojmë misionin në Beograd, ku do ta takojmë presidentin Vuçiç,” tha Lajçak i cili ishte i vetmi nga “Pesëshja e Madhe” i cili u prononcua pas takimit me Kryeministrin Kurti duke shtuar se ata kishin ardhur me një plan, të cilin e kanë diskutuar me Kryeministrin Kurti, dhe do ta diskutojnë edhe me Presidentin serb Aleksandar Vuçiq.

“Erdhëm me një plan, e diskutuam me Kurtin dhe do ta diskutojmë me Vuçiqin. Nuk do të japë detaje,” tha Lajçak.

Lidhur me sulmin e 24 shtatorit në Banjskë, ku u vra polici Afrim Bunjaku dhe u plagosën dy të tjerë, Lajçak tha se kjo dëshmon se normalizimi dhe shtensionimi janë më se urgjente.

“E dëgjuam me kujdes Kurtin dhe shqetësimet e tij për sigurinë e Kosovës. Sulmi terrorist ndaj Policisë së Kosovës nga personat e armatosur përbën një precedent. Dënuam sulmin e 24 shtatorit dhe e bëmë të qartë që fajtorët të sillen para drejtësisë dhe presim bashkëpunimin e plotë të Serbisë në këtë çështje. Sulmi tregoi se normalizimi dhe shtensionimi janë më urgjente se kurrë. Çdo vonesë është e papranueshme dhe presim që Kosova dhe Serbia t’i përmbahen obligimeve të dialogut,” tha Lajçak duke shtuar se sulmi në Banjskë është duke u hetuar nga BE dhe NATO.

Në fund, duke folur si një i dërguar i Presidentit të Serbisë dhe jo Bashkimit Evropian u shpreh:

“Ne presim nga Kosova dhe Serbia që t’i plotësojnë tërësisht detyrimet e tyre brenda dialogut. Ngjarjet e 24 shtatorit nuk e ndryshojnë faktin se Kosova dhe Serbia bënë marrëveshje për normalizimin e marrëdhënieve në fillim të këtij viti.”

Ndërsa Kryeministri i Kosovës, Albin Kurti ka deklaruar në takim me pesë të dërguarit e dialogut, se prioritet kryesor dhe çështje urgjente për Republikën e Kosovës është siguria e shtetit dhe e qytetarëve, e kufijve dhe e territorit. Pas sulmit terrorist dhe kriminal të 24 shtatorit të kryer nga grupe paramilitare me sponsorim dhe pjesëmarrje të Serbisë, ndëshkimi është vendimtar për mospërsëritje.

Sipas njoftimit të Qeverisë, në takim u bisedua për normalizimin e marrëdhënieve mes Republikës së Kosovës dhe Serbisë, përkatësisht zbatimin e Marrëveshjes Bazike të 27 shkurtit në Bruksel dhe Aneksit të Implementimit të tij nga 18 marsi në Ohër.

Kryeministri Kurti theksoi që është i nevojshëm reflektimi cilësor dhe një qasje e re.

Të pesë emisarët, sipas njoftimit të qeverisë, ofruan planin e tyre të ri për ecjen përpara, për çfarë kryeministri ka shprehu falënderimet dhe vlerësimet e tij. “Diskutimet duhet të vazhdojnë intensivisht”, thuhet në përgjigjen e Kryeministrisë.

Ndryshe, vizita e pesë të dërguarve amerikano-evropainë, është e para në Kosovë që nga sulmi i 24 shtatorit kundër policisë në Banjskë të Zveçanit, ku mbeti i vrarë një polic dhe dy të tjerë u plagosën. Përgjegjësinë për organizimin e sulmit e mori Milan Radoiçiç, ish-nënkryetari i Listës Srpska dhe bashkëpunëtor i Presidentit të Serbisë, Aleksandar Vuçiç, arsye kjo pse u la i lirë edhe pasi pranoi organizimin e këtij akti terrorist.

Takimin e fundit, Pesëshja ndërkombëtare e zhvilloi më 20 Janar në prag të raundit të radhës, dhe temë e bisedimeve ishte plani franko-gjerman, për të cilin më vonë u arritë dhe Marrëveshja në Ohër.

Së bashku me të dërguarin Escobar dhe Lajçak, në takimin që u zhvillua në Prishtinë dhe do zhvillohet në Beograd do jenë Këshilltari për siguri dhe politikë të jashtme i presidentit të Francës, Emanuel Bonne, Këshilltari i kancelarit gjerman, Jens Plotner, dhe Këshilltari i Kryeministres së Italisë, Francesco Talo.