Pezullimi i fluturimeve, Basha: Pas grevës qëndron Rama, ta ndëpresë menjëherë!

Pas pezullimit të fluturimeve në Aeroportin e Rinasit për shkak të grevës së kontrollorëve të Albcontrolit dhe kërcënimeve të Edi Ramës, ka reaguar Kryetari i Partisë Demokratike, Lulzim Basha duke e akuzuar Kryeministrin se qëndron pas grevës ndërsa i bëri thirrje ta ndërpresë menjëherë grevën dhe të ndalë kërcënimet ndaj shqiptarëve.

“Rama e di tashmë fare mirë se do të humbasë, prandaj po përdor çdo marifet të pisët. Pas grevës në aeroport që dëmton qytetarët shqiptarë qëndron vetë Rama. Ai është i vetmi përgjegjës për këtë,” thekson Lulzim Basha në reagimin e tij përmes rrjetit social Twitter duke përfunduar:

“I bëj thirrje Ramës ta ndërpresë menjëherë grevën dhe të ndalë kërcënimet ndaj shqiptarëve që sot duan ndryshim dhe shpresë pas 8 viteve të dështimeve të tij.”

Ndryshe, pas pezullimit të fluturimeve në Aeroportin e Rinasit deri nesër në orën 10:00, ka reaguar Presidenti i Republikës, Ilir Meta duke kërkuar nga kontrollorët që të ndërprejnë grevën sepse është cënuar siguria kombëtare ndërsa ka kërkuar nga Qeveria që të gjendet një zgjidhje; Por Kryeministri Edi Rama nuk vonoi duke akuzuar Sali Berishën dhe Ilir Metën si frymëzues të kësaj lëvizje ndërsa kërcënoi organizatorët se do të kallëzohen penalisht.