Pezullimi i taksës, kaos në Ekipin Negociator
Presidenti i Kosovës, Hashim Thaçi, pas takimit të përbashkët me drejtorin kryesor për Çështje Evropiane në Këshillin e Sigurisë Kombëtare të SHBA-së, John Erath, drejtorin për Ballkan të Këshillit Kombëtar të Sigurisë së SHBA-së, Brad Berkley, si dhe me Ekipin Negociator të Kosovës, përkatësisht me zëvendëskryeministrat Behgjet Pacolli, Fatmir Limaj, Enver Hoxhaj, Dardan Gashi dhe me kryetarin e PSD-së, Shpend Ahmeti, bëri të ditur se të gjithë anëtarët e Ekipit Negociator kanë shprehur gatishmërinë e tyre për respektimin e këshillës së SHBA-së për pezullimin e taksës dhe rifillimin e dialogut në Bruksel.
Por bashkëkryesuesi i Ekipit Negociator të Kosovës, Shpend Ahmeti reagoi menjëherë duke mohuar këtë gatishmëri, madje skatësuar se Ekipi nuk është nuk është deklaruar për pezullimin e taksës. Për më shumë, as vetë Shpend Ahmeti nuk është deklaruar për pezullimin, as në këto takime dhe as në takime tjera .
Sipas zyrës për informim të presidencës, në këtë takim është biseduar për procesin e dialogut përfundimtar ndërmjet Kosovës dhe Serbisë, për përgatitjet e këtij procesi dhe tejkalimin e pengesave aktuale, duke përfshirë këshillat e SHBA-së për domosdoshmërinë e pezullimit të përkohshëm të taksës dhe rifillimin e dialogut, si dhe për shtimin e përpjekjeve për arritjen e marrëveshjes gjithëpërfshirëse.
Ishte konstatim i përbashkët se marrëveshja duhet të jetë përfundimtare me njohje reciproke.
Po ashtu, , thuhet në komunikatë, presidenti Thaçi edhe në takimin e sotëm ka ripërsëritur qëndrimin se me asnjë kusht dhe në asnjë rrethanë, Republika e Kosovës nuk do t’i rrezikojë marrëdhëniet ndërshtetërore dhe miqësinë speciale me SHBA-në.
“Të gjithë anëtarët e Ekipit Negociator kanë shprehur shqetësimin për veprimet agresive të Beogradit, por në të njëjtën kohë kanë shprehur edhe gatishmërinë e tyre për respektimin e këshillës së SHBA-së për pezullimin e taksës dhe rifillimin e dialogut në Bruksel”, thuhet në përfundim të kësaj komunikate.
Por bashkëkryesuesi i Ekipit Negociator të Kosovës dhe kryetari i PSD, Shpend Ahmeti, ka reaguar ndaj komunikates se leshuar nga zyra e Presidentit, ku shprehet gatishmëria për pezullimin e taksës ndaj Serbisë dhe vazhdimin e dialogut.
“Delegacioni Shtetëror nuk është deklaruar për pezullimin e taksës. Ka qendrime te subjekteve të ndryshme dhe ato janë tashmë të njohura për publikun. Për më shumë, as unë nuk jam deklaruar për pezullimin, as në këto takime dhe as në takime tjera. Kemi folur për arsyeshmërinë e taksës dhe pse ka qenë e nevojshme,” tha Ahmeti duke qenë i kujdesshëm ndaj partnerit qeverisës për të mos e akuzuar edhe pse bëhej fjalë për komunikatë nga Zyra e Presidentit, dhe duke zgjedhur rrugën më të lehtë duke fajësuar disa mediaqë “po informojnë”.
Ja reagimi i plotë:
Disa media po informojnë se Delegacioni Shtetëror kinse qenka deklaruar për suspendimin e taksës.
Delegacioni Shtetëror nuk është deklaruar për suspendimin e taksës. Ka qendrime te subjekteve të ndryshme dhe ato janë tashmë të njohura për publikun. Për më shumë, as unë nuk jam deklaruar për suspendimin, as në këto takime dhe as në takime tjera. Kemi folur për arsyeshmërinë e taksës dhe pse ka qenë e nevojshme.
Qëndrimi i SHBA është i qartë. Edhe arsyeja e taksës është e qartë. Tash i mbetet Kosovës me vendos se cili është interesi strategjik. Çfarëdo veprimi që shihet si fitore personale dhe fitore elektorale e dëmton Kosovën dhe pozicionin negociator të saj.
