Pezullimi i vizave për Shqipërinë/ Konfirmohet, KE ka marrë kërkesën e Holandës. Tani Parlamenti Evropian…

Komisioni Europian konfirmon se ka marrë nga Holanda kërkesën për të aktivizuar pezullimin e lëvizjes së lirë afatshkurtër për qytetarët shqiptarë në zonën Shengen, i njohur ndryshe si mekanizmi i pezullimit të vizave. Hapi i ardhshëm, ka sqaruar Zëdhënësja e KE, Natasha Bertaud, është të informojë Parlamentin Evropian dhe Këshillin Evropian dhe të shqyrtohet kërkesa:

 “Ne konfirmojmë që kemi marrë kërkesën e Holandës për Shqipërinë lidhur me aktivizimin e mekanizmit të pezullimit së vizave. Komisioni tani do të shqyrtojë me kujdes brendësinë e kërkesës bazuar në të dhënat e paraqitura dhe rrethanat specifike. Hapi i ardhshëm i yni është të informojë Parlamentin Evropian dhe Këshillin Evropian dhe të shqyrtojmë kërkesën. Sigurisht që vendimi për pezullimin e lëvizjes së lirë nuk mund të merret lehtësisht dhe çdo hap drejt aktivizimit të këtij mekanizmi do t’i nënshtrohet një analize dhe shqyrtimi shumë të kujdesshëm, kryesisht lidhur me marrjen në konsideratë të kritereve të përfshira në këtë procedure,” tha Zëdhënësja e Komisionit Europian duke ju përgjigjur ABC News në konferencën e sotme për media në Bruksel duke saktësuar se cila është dhe procedura:

“Sipas procedurës dhe rregullave, nëse rrethanat kërkojnë marrjen e masave specifike dhe pa paragjykuar nëse do të ketë të tilla, Komisioni duhet tê adoptojë një akt zbatimi brenda një muaji dhe ky akt zbatimi duhet tê aprovohet nga Këshilli i Ministrave të BE-së.”

Ndryshe, kjo është hera e parë që Komisioni Europian merr kërkesën nga një shtet anëtar i Bashkimit Evropian lidhur me nevojën e aktivizimit të mekanizmit të pezullimit të lëvizjes së lirë afatshkurtër.