Pezullohet gazetari që do të moderonte debatin Trump-Biden

Gazetari veteran në Shtetet e Bashkuara, i cili është zgjedhur për të moderuar debatin e dytë midis Presidentit të SHBA, Donald Trump, dhe sfiduesit të tij, Joe Biden, u pezullua, pasi pranoi se ka gënjyer se llogaria e tij në Twitter është hakuar. Steve Scully, gazetar i kanalit kabllor C-SPAN, u pezullua për kohë të pacaktuar.

Scully do të moderonte debatin e planifikuar për 15 tetor, por ai është anuluar, pasi organizatorët e kanë shndërruar në debat virtual. Organizatorët e kanë cilësuar si shqetësim infektimin e Trumpit me koronavirus, por Trump ka refuzuar të marrë pjesë në debat virtual.

Javën e kaluar, Scully ka qenë i përfshirë në një shkëmbim në Twitter me Anthony Scaramuccin, ish-ndihmës i Trumpit, tani kritik i tij. Scully është dukur se ka kërkuar këshilla prej tij. Kur shkëmbimi ka nxitur polemika, Scully ka thënë se llogaria e tij është hakuar.

Në një deklaratë të kërkim-faljes, Scully tha se ka zhgënjyer kolegët e tij. “U kërkoj falje atyre”, tha ai.

“Ne u dëshpëruam shumë nga ky lajm dhe nuk i falim veprimet e tij”, tha përmes një deklarate kanali C-SPAN.

Steve Scully, raporton RFE, ka mbuluar zgjedhjet presidenciale në C-SPAN për gati 30 vjet dhe ka krijuar një reputacion për mbulim të balancuar. Është e paqartë se kur do të kthehet, por pezullimi i tij sugjeron se ai do të jetë jashtë programit në natën e zgjedhjeve presidenciale në SHBA, më 3 nëntor.