Plagosën një person dhe goditën policinë, shpallen në kërkim dy djemtë e Tom Doshit

Pasi plagosën me sende të forta një person dhe më pas goditën edhe punonjësit e policisë, dy djemtë e Ish-Deputetit Tom Doshi janë shpallur në kërkim .

Markos dhe James Doshi janë përfshirë në një sherr, kanë goditur punonjësit e policisë dhe më pas janë larguar nga vendngjarja.

Burime bëjnë me dije se ngjarja ka ndodhur në zonën e Ish-Bllokut, ndërkohë që dy djemtë e Ish-Deputetit tashmë janë shpallur zyrtarisht në kërkim.

Në njoftimin zyrtar të policisë thuhet se vëllezërit Doshi kanë rrahur 38-vjeçarin me inicialet R.S.

“Specialistët për Hetimin e Krimeve në Komisariatin e Policisë Nr. 2 bënë arrestimin në flagrancë të shtetasit E. L., 34 vjeç, banues në Tiranë, për veprat penale “Goditja për shkak të detyrës”, “Plagosja e lehtë me dashje” dhe “Prishja e qetësisë publike”.

Gjithashtu, shpallën në kërkim për veprat penale “Plagosja e rëndë me dashje”, “Goditja për shkak të detyrës”, “Kundërshtimi i punonjësit të Policisë së rendit publik”, “Mosbindja ndaj urdhrit të punonjësit të Policisë së rendit publik” dhe “Prishja e qetësisë publike”, të kryera në bashkëpunim, shtetasit M. D., 20 vjeç dhe J. D., 22 vjeç, të dy banues në Tiranë,” thuhet në njoftimin e policisë Tiranës duke saktësuar:

“Këta 3 shtetas, gjatë një konflikti për motive të dobëta, në rrugën “Ismail Qemali”, kanë goditur me sende të forta shtetasin R. S., 38 vjeç, dhe më pas nuk i janë bindur urdhrave të punonjësve të Policisë, për të ndaluar, por i kanë kundërshtuar ata, duke i goditur për shkak të detyrës. Shtetasi E. L. është vënë në pranga, ndërsa shtetasit M. D. dhe J. D. janë larguar. Vijon puna për kapjen e tyre.“