Planet vendore pas tërmetit, KLSH: Kontratat me negocim u fituan kryesisht nga 2 operatorë
Pas tërmetit të nëntorit 2019 lindi nevoja që bashkitë e prekura të miratonin plane të detyruara vendore që do të reflektonin ndryshimet dhe zhvillimet që do të ndodhnin në terren në përgjigje të kësaj.
Kontrolli i Lartë i Shtetit gjatë një auditimi në Agjencinë Kombëtare të Planifikimit të Territorit ka konstatuar se nga 40 plane që u hartuan në total në një procedurë me negocim pa shpallje paraprake janë të paktën dy operatorë që kanë fituar një numër jo të vogël planesh ndërkohë që ishin të paktën 15 operatorë potencialë.
“Nga auditimi për hartimin e Planeve të Detyruara Vendore për zonat e prekura nga tërmeti, rezulton se janë realizuar 40 plane të tilla me fond limit 84,139,663 lekë dhe realizuar në vlerën 78,840,674 lekë. Nga të dhënat në dispozicion, rezulton se janë lidhur kontratat e shërbimit me 15 operatorë ekonomik, për 40 procedurat e realizuara, nga ku për 8 procedura është shpallur fitues operatori U., pasi është ftuar në 30 raste, ndërkohë në 31 raste është ftuar edhe operatori ekonomik A., në kundërshtim me pikën 6 të Udhëzimit nr. 2, datë 08.01.2018 “Mbi përdorimin e procedurës negocim pa shpallje”. Për sa më lart, AK nuk ka garantuar një përzgjedhje jo diskriminuese të operatorëve ekonomikë, pasi nuk ka paraqitur argumentim të qartë për arsyet e përzgjedhjes në mënyrë kaq të përsëritur të dy operatorëve, ndërkohë që ka kualifikuar si të përshtatshëm për konkurim 15 operatorë ekonomikë” thuhet në auditimin e KLSH.
Ky i fundit ka kërkuar që nga ana e AKPT të mbahet parasysh që në këto raste të ketë përzgjedhje më të larmishme operatorësh duke nxitur kështu edhe konkurrencën.
“Në procedurat e prokurimit negocim pa shpallje, Agjencia Kombëtare e Planifikimit të Territorit të marrë masa për nxitjen e konkurueshmërisë, duke përzgjedhur dhe ndërruar vazhdimisht operatorët ekonomik potencial që fton për të garuar” thuhet në dokument.
Tërmeti i 26 nëntorit 2019 shkaktoi dëme në vlerën 1 miliardë në vend dhe preku një sërë qarqesh ndërkohë që pas tij zuri vend procesi i rindërtimit i cili është ende në vijim kryesisht në zonën e Tiranës dhe Durrësit ku dëmet ishin edhe më masive./Monitor/
