Plani franko-gjerman, Albin Kurti: Njohje de facto nga Serbia!

Plani evropian për dialogun Kosovë-Serbi përfshin njohje de facto nga Serbia, tha sot Kryeministri i Kosovës, Albin Kurti, duke shtuar se në plan s’ka njohje de jure, por ajo është pjesë sekuenciale e planit.

“Njohja dejure e Serbisë është e qartë nuk është në mënyrë eksplicite e thënë aty por është ajo de facto. Ama është pjesë sekuenciale e planit,” tha Albin Kurti.

Në seancën e sotme të Parlamentit të Kosovës, Kryeministri Kurti gjithashtu i është përgjigjur deputetëve opozitarë për akuzat për përmbajtje të planit.

Sipas tij, marrëveshja i vendos Kosovën dhe Serbinë si dy identitete të barabarta ndërkohë opozita hodhi kritika të ashpra në drejtim të qeverisë duke thënë se Albin Kurti ka dështuar gjatë këtyre dy viteve të qeverisjes.

“Të dashuruarve e çifteve të reja Shën Albini u premtoi banesa të përballueshme që të kenë mundësi të nisin jetën e përbashkët me lehtësi. Jo që nuk e ka realizuar asnjë deri sot, por është siguruar që edhe çifteve më të vjetra tu shtrenjtojë tatimin në pronë e t’ua rëndojë jetën. Asnjëherë nuk ka pasur një rend kaq të gjatë të të rinjve e profesionistëve para ambasadave për ta lëshuar vendin. Asnjëherë s’ka pasur ulje të rrogave. Sot me idenë e rritjes së rrogave dhe barazisë, në shumicën e kategorive janë ulur rrogat,” tha deputetja e PDK, Eliza Hoxha duke përfunduar:

“Pak si më shkurt, në Qeveri çdo ditë ka dasmë, sa halla, sa tezja, sa motra e vëllezër të punësuar në secilin bord e institucion publik”.

Deputetja e LDK, Hykmete Bajrami, ka pyetur kryeministrin Albin Kurti se cilat janë sukseset në ekonomi dhe cila është reforma e vetme e cila është marrë në fushën e politikave fiskale.

“Ju keni dështuar të bëni një reformë të vetme fiskale, një projekt të vetëm sa i përket përmirësimit të ambientit të biznesit,” tha Ish-Ministrja e Financave, Hykmete Bajrami.

Ndërsa deputeti i AAK, Besnik Tahiri, tha se me qeverisjen Kurti, Kosova është më e varfër ndërsa qytetarët kanë humbur shpresën kanë marrë rrugën e mërgimit.

“Duke i shtyrë përpara ligjet antikushtetuese është prekur shtylla kurrizore, bazamenti i një shteti që është administra ligjore dhe shteti ligjor. Kosova është më e varfër që nga 14 shkurti i vitit 2021. Qytetarët e Kosovës duke e humbur shpresën kanë marrë rrugën e mërgimit. Duke mos mundur ta konceptojnë zhvillimin, duke mos pasur asnjë investim të huaj tash e dy vjet, duke thënë se do të bëjnë me qindra çerdhe, Qeëveria Kurti është kthyer në një instancë që vetëm flet për 20 vjetët e kaluar,” tha Besnik Tahiri.

Kryeministri i Kosovës, Albin Kurti, duke iu përgjigjur deputetëve, tha se përgjatë këtyre dy vjetëve kanë shënuar arritje të mëdha në drejtësi e punësim, pasi edhe aty ka qenë fokusi i tyre si Qeveri.

“Për të parën, të gjithë pajtohen se është bërë një punë e jashtëzakonshme e Policisë së Kosovës për luftimin e krimit të organizuar. Nga fillimi i mandatit janë realizuar mbi 850 operacione policore, mbi 3.200 persona të arrestuar – prej tyre 301 zyrtarë publik[, 69 grupe kriminale janë shkatërruar,” tha Albin Kurti ndërsa për akuzat opozitare lidhur me ikjen e të rinjve për shkak të keqqeverisjes, Kryeministri i Kosovës tha se janë duke punuar në vazhdimësi për secilin qytetar të vendit pa dallim dhe kanë për synim kthimin e besimit në institucione në shtet dhe ngritjen e mirëqenies sociale për ta zvogëluar migrimin.

Në fund, Kryeministri i Kosovës i Kosovës, Albin Kurti, foli me mburrje edhe për punësimin brenda këtij dy vjeçari:

“Nga fillimi i mandatit deri më sot, kemi mbi 40 mijë më shumë të punësuar!”

Ndryshe, në zgjedhjet e parakohshme parlamentare më 14 shkurtit të vitit 2021, Lëvizja Vetëvendosje doli fituese me 50.28 për qind të votave. Qeveria e Kosovës me Kryeministër Albin Kurtin u formua më 22 mars të vitit 2021.