Plani i “Fitores Zelenskyy”, Kremlini: Do ta studiojmë nëse publikohet zyrtarisht!

Kremlini tha sot se do të studiojë atë që Presidenti ukrainas Volodymyr Zelenskyy e ka cilësuar si “Plani i fitores”, i cili synon t’i japë fund luftës me Rusinë, kur detajet rreth tij të bëhen publike.

Volodymyr Zelenskiy do t’ia paraqesë planin këtë javë Presidentit amerikan Joe Biden si dhe dy kandidatëve për president, Kamala Harris dhe Donald Trump, gjatë vizitës së tij në Shtetet e Bashkuara.

Nesër Volodymyr Zelenskyy pritet të mbajë dhe një fjalim para Asamblesë së Përgjithshme të OKB-së.

Plani, detajet e së cilit nuk janë bërë publike, duket se është një përpjekje e fortë nga ana e zotit Zelenskiy për të bindur Uashingtonin dhe aleatët e tjerë, që të ofrojnë ndihmë të mëtejshme dhe më të madhe për vendin e tij në një përpjekje për të detyruar Moskën që t’i japë fund konfliktit bazuar në kushte të pranueshme për Kievin.

Zyrtarët ukrainas kanë sugjeruar që Rusia të ftohet në një takim të nivelit të lartë për të diskutuar mbi zgjidhjen e konfliktit bazuar tek ky plan.

I pyetur mbi iniciativën e Volodymyr Zelenskyy, zëdhënësi i Kremlinit Dmitry Peskov u tha gazetarëve se Moska nuk mund të analizojë njoftime mediatike./VOA/