Plani i investimeve, Rama: Premtimet janë ëndrra, këto janë…

Kryeministri Edi Rama doli për të folur për infrastrukturën kombëtare rrugore, portuale, aeroportuale dhe Planin 28 miliardë euro të Bashkimit Europian për Ballkanin Evropian në infrastrukturë, energji, digjitalizim, por asgjë nuk dallonte nga qershori i vitit 2013 duke premtonte si opozitar, me përjashtim të ca hartave dhe projekteve që kishin edhe shifra konkrete. Sërish premtoi dhe u mor me punët e Sali Berishës dhe përfundoi me një parashikim të frikshëm nëse zgjedhjet do të zhvilloheshin të dielën!

”Do të na ndihmojë dhe shumë plani i ri i investimeve të KE, infrastrukturën me mjetet e transportit dhe patjetër të rrugëve automobilistike. Energjia ku Shqipëria ka një pozicion kyç dhe ka një avantazh të rëndësishëm në raport me vendet e tjera të rajonit, për të qenë protagonist në këtë pjesë të Ballkanit. Shqipëria ka një plan të qartë për shtrirjen e infrastrukturës së gazit, qoftë në veri me gazsjellësin Adriatiko-jonian që shkon në Mal të Zi, Kroacia.

Qoftë edhe me degëzimet, ai i Kosovës që është strategjik. Dhe dixhitalizimi. Ku bëhet fjalë për ndërhyrje masiev për të forcuar ndërlidhjen dixhitale në rajon. Të tre këto shtylla kanë në thelb komponentin e impaktit rajonal. Janë shtylla që do të ngrihen individualisht në çdo vend,” tha Edi Rama duke shtuar se përgatisin një thirrje publike për ekspertët shqiptarë jashtë vendit:

“Ata duhet të bëhen pjesë e kësaj përpjekje, skuadër ekselence për projektet. Mundësisht për të mundur të thithim fondet nga BE, me të hyrë në fuqi me aprovimin e buxhetit nga KE dhe Këshilli Europian. Të mund të shohim zbatimin në periudhën 2021- 2023 si procese që përfshijnë faktikisht këtë mandat dhe këtë plan buxhetor të KE.”

Premtimet janë ëndrra kurse këto janë projekte tha Kryeministri i Shqipërisë, duke folur infrakstrukturën  rrugore, e meqë deri sot nuk e pa njeri përveç projekteve të bukura 3D ai bëri atë që bënë më së miri, shau Saliun!

”Premtimet janë ëndrra, ambicie, dëshira, vullnet i mirë për të shkuar drejt një objektivi, kurse këto janë projekte. Portet s’janë premtime, janë procese të avancuara. Në pak javë porti i ri i Durrësit do jetë në garë ndërkombëtare. Në pak javë procesi i ri i Vlorës do jetë i hapur. Për portin e madh turistik të Durrësit jemi në bisedime me një shtet mik, për një proces shtet me shtet.

Nuk dua të jap më shumë detaje, sepse jemi në një proces të avancuar, dhe shkojnë bashkë. Për ta transformuar portin e Durrësit në turistik, që do jetë një qytezë në ujë aty ku sot janë malet me krom. Duhet të garantojmë portin e ri. Porti i Sarandës është një proces gati në përfundim, dhe në pak muaj nis investimi. Këto janë projekte në proces. Do maturohen pas shumë vitesh përpjekje. Kemi pasur edhe zbrapsje, si porti i Karpenit. Rruga Milot-Fier nuk është më premtim, ishte në 2013 kur unë flisja për Korridorin Blu, dhe Saliu zgërdhihej e bridhte si punëtor rrugësh duke qepur e shqepur. Madje duke arritur një rekord botëror.

Rekordi botëror i Saliut, nga Shkodra në Muriqa në Kakavijë, nëse nisesh ka 28 standarde gjatë rrugës. Imagjoni sikur ti për shembull të veshësh xhaketën time, këmishën e Erion Braçes, pantallonat e Bashkim Finos, edhe jelekun antiplumb të Saliut. Imagjino çfarë dordoleci. Ne po standardizojmë. Çfarë sigurie ka arritur rrugët e Saliut? Me këto qepje e shqepje. Nga Shkodra në Tiranë çfarë sigurie ka ofruar Saliu?

Natyrisht që drejtuesit gabojnë në matjen e shpejtësisë së deles, por nëse heqim delen, largojmë lopët, pishinat, magazinat i ndajmë nga rruga, dhe u japim gjithë njerëzve hapësirë. S’të del më fauna e egër, ku mund të dalë ndonjë sorkadhe, lepur apo ujk. Shihni rrethrrotullimet çfarë pikash katastrofike kemi.”

Edhe sot u përsërit ndoshta dhe foli për ata që kanë lindur pas qershorit të vitit 2013, gjithsesi tre projektet e tre aeroporteve i premtoi sot se do ti ndërtojë në Kukës, Vlorë e Sarandë.

”Dua të nënvizoj se krahas kantiereve të infrastrukturës rrugore, për të cilat do të nisen disa kantiere të mëdha të infrastrukturës aktuale dhe aeroportuale. S’më ka rënë në sy, mbase e kemi bërë po, askush s’ka shkuar të shohë kantierin e Kukësit, ku po bëhet një punë e jashtëzakonshme. Gjithë aeroporti i ri po merr formë, edhe pse faza përmbyllëse e punimeve do të kërkojë edhe disa muaj. Jemi duke punuar për hir të së vërtetës, pasi dita ime nis me telefonatën me ministren, dhe mbyllet po me ministren për të çarë shtegun nga pandemia për aeroportin e Vlorës. Ditët në vijim do kemi një qartësi për këtë proces, pasi gara është ndërprerë prej pranverës. Do rihapet aty ku është ndërprerë, me një periudhë të shkurtër kohe të mbetur, dhe do ketë prezencë të kompanive të interesuara, që në panoramën globale të krizës janë pjesa më e goditur,” tha Rama dhe me të mbyllur Vlorën:

“Do të lançojmë procesin për Sarandën që është bërë gjithë strategjia. Duhet bërë hap pas hapi, jo bashkë menjëherë. Saranda do ketë aeroport më të vogël, me impakt strategjik për turizmin. Kemi shumë besim se nëse Vlora do jetë sukses, në aspektin e pjesëmarrjes dhe përfshirjen e një entiteti prestigjioz, padyshim që edhe Saranda s’ka arsye pse mos jetë. Por Vlora është strategjike.”

Për ata që i besuan gjithë këto premtime nuk kanë arsye të mos besojnë se në javët në vijim, Edi Rama do të hedhë në garë ndërkombëtare Portin e ri të Durrësit:

“Do të zhvillohet në anën tjetër, aty ku është edhe plani i zonës së lirë ekonomike. Po kështu do të bëjmë edhe me Vlorën. Projekti me Lungomaren përfshin dhe një port turistik, që do të jetë aty për të krijuar një kanal të ri kontakti me Vlorën. Ndërkohë edhe për Vlorën jemi gati për një proces, ku do mund të sistemojmë me standarde bashkëkohore portin e shërbimeve në anën tjetër.

Në pak javë do mund të fillojmë të japim gjithë autorizimet për fillimin e portit të tretë turistik, që do të jetë i pari që do të fillojë, në Sarandë. Për këtë kemi marrë një propozim fantastik dhe që ndryshon gjithë paradigmën e Sarandës. Kështu, Shqipëria do të hyjë në hartën e turizmit të detit, që ka munguar me dekada, në aspektin e ekonomisë së detit,” tha Kryeministri e meqë nuk ka mundësi për port i premtoi aerport:

“Ne besojmë se aeroporti i Kukësit do të jetë funksional në pranverë. Nuk e kam harruar premtimin për 120 vota për demokratët. Nëse më ndjekin i ftoj të fillojnë rezervimin për fluturim falas, që të vijnë të votojnë për PD.”

Si do vijnë këta kuksianë?! Pse muhabet është ky kur kanë Kryeministër, Edi Ramën:

“Nuk do të jetë një fluturim me taksat e qytetarëve. Natyrisht nuk mund të jetë një fluturim me shpenzimet e mia, se nuk e kam mundësinë për një fluturim të tillë, por kur ta bëjmë fluturimin, do ta themi se si. Do jetë një fluturim si rezultat i përqeshjeve dhe sharjeve pa mbarim të këtyre nga Londra. Kjo është ide shumë dashamirëse, nuk ka asnjë të keqe brenda, por realisht është fatkeqësi e madhe, kur akoma sot shumëkush nuk do ta dijë që projektet nisin në tryezë dhe nga ideja te zbatimi ka një rrugë të gjatë.”

Kryeministri Edi Rama natyrisht që i harroi naftëtarët që vazhdojnë me grevën e tyre të urisë por edhe pse u pyet në fund nga gazetarët nuk është se fitoi njeri.

”Në rastin e naftëtarëve, e kam përsëritur edhe sot, s’jemi palë përballë një pale. Ne jemi faktikisht pjesë e një familje, dhe me naftëtarët s’kemi asnjë llogari të hapur apo për të mbyllur, sepse është marrëdhënie private. Por në kushtet kur kanë këto vështirësi, dhe refuzojnë të hyjnë në asistencë shtetërore sipas ligjeve, jemi të gatshëm të qajmë hallin, që as e ka krijuar qeveria, dhe s’kemi shkop magjik.

Duhët të dalin nga greva nëse duan të bisedojnë. Grevat bëhen për sensibilizim, ne jemi, s’kemi pse, jemi që nga dita 1.

Me ultimatume dhe me presion, me shantazhe, me kërcënime, me forma detyruese, me shprehje paga pastaj ulemi flasim, nuk funksionon. Jam shumë i keqardhur, sepse nuk është aspak e lehtë të flesh jashtë shtëpisë, jam i gatshëm sot në sekondë të bisedojmë me logjikë, gjëja më e lehtë të futesh në grevë, dalin disa në rrugë aty na bëni kanalizime ose do bllokojmë rrugën. Ku jemi këtu? Ne s’po rrimë, po bëjmë gjithçka kemi ne në dorë. Nëse është ndërtuar një qytet i tërë pa leje, atëhere do ketë probleme. Ne kemi bërë dhe do bëjmë kanalizime, por s’bëhen brenda ditës. Me presione s’fitoni me mua. Si xhagajdurët, si njerëzit në hall.”

Në fund, për të kuptuar pse Kryeministri Edi Rama e bëri gjithë këtë prezantim për infrastrukturën kombëtare rrugore, portuale, aeroportuale dhe Planin 28 miliardë euro të Bashkimit Europian për Ballkanin Perëndimor dhe sa mund të merret seriozisht mjafton bindja e tij që i referohet, sipas Ramës, sondazheve të brendshme:

“Nëse zgjedhjet do të zhvilloheshin të dielën, ato i fiton PS!”