“Plani i Rritjes”,BE: 64.5 mln € parafinancim! Gonzato: Nxit ekonominë, forcon sundimin e ligjit, mbështet një Shqipëri më të gjelbër!
“Shqipëria sapo ka marrë 64.5 milionë euro parafinancim sipas Planit të Rritjes së BE-së për Ballkanin Perëndimor! Kjo pagesë e parë mbështet reformat dhe investimet e Shqipërisë për të forcuar vendin dhe për ta afruar atë me BE-në”.
Lajmin e ka bërë të ditur Ambasada e BE në Tiranë përmes rrjetit social X.
Albania 🇦🇱 has just received €64.5 million pre-financing under the EU’s Growth Plan 🇪🇺 for the Western Balkans! This first payment supports Albania’s reforms and investments to strengthen the country and bring it closer to the EU.
— EU in Albania (@EUinAlbania) March 25, 2025
🔗 Read more about the Growth Plan and the… pic.twitter.com/C5LyOCkVhI
Ndërkohë Ambasadori i BE në Tiranë, Silvio Gonzato, duke e uruar Shqipërinë për atë që e quajti një moment të rëndësishëm në rrugëtimin e saj të anëtarësimit në BE saktëson dhe dedikimin e këtij parafinancimi.
“Urime Shqipërisë për arritjen e një tjetër momenti të rëndësishëm në rrugëtimin e saj të anëtarësimit në BE. Plani i Rritjes nxit ekonominë, forcon sundimin e ligjit, mbështet një Shqipëri më të gjelbër dhe fuqizon kapitalin njerëzor. BE qëndron me Shqipërinë në rrugën e saj drejt anëtarësimit,” shprehet Gonzato.
Me këtë parafinancim, Shqipëria mori 30 milionë euro kredi koncesionare për buxhetin e shtetit, si mbështetje për zbatimin e reformave. Parafinancimi i mbetur prej 34.5 milionë euro, në grante dhe hua koncesionare, do t’i injektohet drejtpërdrejt Western Balkans Investment Framework, WBIF, për investime në infrastrukturë në Shqipëri.
Deri në vitin 2027, Shqipëria ka mundësinë të marrë deri në 922.1 milionë euro në total nga Fondi i Reformës dhe Rritjes për Ballkanin Perëndimor, në këmbim të reformave në sundimin e ligjit dhe të drejtat themelore, energjinë e rinovueshme, ekonominë dixhitale, kapitalin njerëzor dhe zhvillimin e sektorit privat.
Pagesat e ardhshme në kuadër të Facilitetit do të bëhen me përfundimin e hapave të reformës të rënë dakord ndërmjet Komisionit dhe Qeverisë shqiptare në Agjendën e Reformave. Ndërsa Shqipëria përparon në zbatimin e Agjendës së Reformave, BE do të zhbllokojë pagesat.
Ndryshe, Plani i Rritjes për Ballkanin Perëndimor ofron 6 miliardë euro ndihmë financiare shtesë për të mbështetur reformat socio-ekonomike dhe themelore dhe investimet përkatëse . Pagesat kushtëzohen me arritjen e reformave të specifikuara në Agjendat e Reformave të përgatitura nga secili përfitues.
