Plani i Rritjes, Komisionerja e Zgjerimit me liderët e Ballkanit Perëndimor sot dhe nesër në Shkup

Sot dhe nesër në Shkup, Komisionerja e Zgjerimit e Bashkimit Evropian, BE, Marta Kos, do të takohet me liderët e gjashtë vendeve të Ballkanit Perëndimor me qëllim të përshpejtimit të zbatimit të Planit Evropian të Rritjes për Ballkanin Perëndimor.

Liderët e Shqipërisë, Kosovës, Bosnje Hercegovinës, Malit të Zi, Maqedonisë së Veriut dhe Serbisë me Komisioneres Kos, thekson Komisioni Evropian përmes një njoftimi, do të përqendrohen në reformat kyçe me qëllim që të “zhbllokojnë” pagesat e fondeve sipas Planit të Rritjes për Ballkanin Perëndimor dhe t’u sjellin përfitime të prekshme qytetarëve të vendeve kandidate për anëtarësim në BE para anëtarësimit.

Samiti, thekson njoftimi, do të jetë gjithashtu një mundësi për të diskutuar fusha të reja bashkëpunimi: mbrojtja e konsumatorit, turizmi dhe Rruga drejt Tregut të Përbashkët, e cila duhet të përshpejtojë integrimin ekonomik të Ballkanit Perëndimor në Tregun e Përbashkët të BE-së.

Gjatë takimit dyditor, Komisioni Evropian do të propozojë një paketë investimi prej 87.7 milionë eurosh brenda Kornizës ekzistuese të Investimeve për Ballkanin Perëndimor (WBIF), e cila duhet të drejtojë pothuajse 500 milionë euro investime private në projekte të energjisë së pastër në të gjithë rajonin, thuhet në njoftim.

Plani i rritjes për Ballkanin Perëndimor ofron përfitime për vendet e rajonit që po përgatiten për anëtarësim në BE, dhe pjesëmarrësit e takimit do të shqyrtojnë progresin dhe do të diskutojnë hapat e mëtejshëm, thuhet në njoftim.

Qëllimi i Planit, thekson KE, është të stimulojë ekonominë e Ballkanit Perëndimor dhe të ndihmojë vendet e atij rajoni të bashkohen me Unionin.

Plani i rritjes parashikon mbështetje financiare prej gjashtë miliardë eurosh, nga të cilat dy miliardë janë grante, dhe katër miliardë janë kredi të favorshme të dhëna nga BE, për reforma dhe investime në fusha të tilla si energjia, transporti dhe transformimi dixhital, me qëllim rritjen e prosperitetit dhe stabilitetit në rajon.

Ndryshe, Qeveria e Maqedonisë së Veriut ka njoftuar se Kryeministri Hristijan Mickoski do të takohet kokë më kokë me Komisionerin Kos sot dhe të dy do t’i drejtohen publikut së bashku nesër.

Nesër do të mbahen dy panele, i pari do t’i kushtohet Planit të Rritjes, dhe i dyti mekanizmave specifikë dhe mbështetjes për zbatimin e tij.