Plarent Ndreca i pandehur, SPAK thërret deputetin e Edi Ramës që ti komunikoj akuzën
Prokuroria e Posaçme kundër Korrupsionit dhe Krimit të Organizuar i ka dërguar fletëthirrje deputetit të Partisë Socialiste, Plarent Ndreca, ku do të merret i pandehur dhe do t’i njoftohet nga SPAK akuza e shkeljes se barazisë në tendera.
Mësohet se SPAK ka mbyllur hetimet lidhur me tenderin për rikonstruksionin e komisariateve Nr.4 në Tiranë, Vlorë, Pogradec dhe Mirditë, kur dyshohet se Plarent Ndreca si Sekretar i Përgjithshëm i Ministrisë së Brendshme, ka kryer veprën penale.
Kallëzimi në SPAK u bë nga Kontrolli i Lartë i Shtetit, i cili dyshon se 5 zyrtarë të Ministrisë së Brendshme kanë lejuar mospërputhje dhe devijime ligjore në garën për ndërhyrje në 4 Komisariate.
Ndryshe, për mospërputhje dhe devijime ligjore, si pasojë e shkeljeve të dispozitave ligjore në procedurat e prokurimit publik, të cilat kanë cenuar barazinë e pjesëmarrësve dhe operatorëve ekonomik në këtë procedurë dhe njëkohësisht rritje të paargumentuar të vlerës së kostove të ndërtimit dhe kostove të projektimit në procedurën e prokurimit, Kontrolli i Lartë i Shtetit depozitoi në Prokurorinë e Posaçme Kundër Korrupsionit dhe Krimit të Organizuar kallëzim penal ndaj 5 funksionarëve të Ministrisë së Brendshme, përgjegjës për vlerësimin e ofertave në procedurën e prokurimit me objekt “Studim, Projektim i disa objekteve të Policisë së Shtetit” për veprën penale “Shkelja e barazisë së pjesëmarrësve në tendera apo ankande publike” parashikuar nga neni 258 i Kodit Penal.
