Platforma Antikorrupsion, Basha: Ligji Antimafia, Vendimi i parë i Qeverisë së re!

Kryetari i Partisë Demokratike, Lulzim Basha, pasi prezantoi sot Platformën Antioligarki dhe Antikorrupsion, e cila pritet të vihet në zbatim përmes përditësimit dhe ndryshimit që do i bëhet “Ligjit Antimafia”, tha se ky do të jetë dhe Vendimi i parë i Qeverisë së re pas miratimit nga Parlamenti i ri.

“Ligji Antimafia i miratuar nga parlamenti i ri legjitim do të jetë vendimi i parë i Qeverisë së re dhe do të zbatohet. A ka situata më të rënda se sa në një vend paratë të zhduken e të vidhen nga një grup njerëzish? Si kemi arritur deri këtu? Zgjidhjen e shohim te ligji Antimafia,” tha Lulzim Basha duke shtuar se ky ligj do të bazohet në një bazë logjike dhe ligjore:

“Çdo koncension, çdo PPP kalon përmes një kontrate mes privatit e publikut. Kontrata në përputhje me ligjin ka forcën e ligjit, ato që bien në kundërshtim me të janë të pavlefshme. Çdo gjë e marrë në mënyrë abuzive do t’i kthehet publikut me efekt prapaveprues.”

“Mekanizmi bazë është ai i ndryshimit në ligjin Antimafia. Këto masa të parashikuara me ligjin tonë Antimafia të përditësuar, fokusohen te pasurua e zyrtarëve publikë që kanë abuzuar, pronarëve të kompanive private dhe të afërmve të tyre, dënohen apo jo, pasuritë e tyre sekuestrohen dhe konfiskohen.

Kompani që licensiohen pak para tenderit, kompani pa përvojë, kompani off shore, shpikje e propozimeve të pakërkura, tendera ndaj njerëzve të paautorizuar, skualifikime të padrejta për qëllime klienteliste, kompani që i plotësojnë kriteret po i skualifikojnë. Këto janë disa nga format e abuzimit që janë lidhur këto kontrata. Sikur njëra nga këto të vërtetohet çdo qindarkë do ju kthehet shqiptarëve me Ligjin Antimiafia,” tha lideri i Opozitës së Bashkuar duke sqaruar dhe itinerarin e zbatimit të masave:

“Zbatimi i masave do kalojë nga tre hallka: Qeveria është e para do ketë detyrën e verifikimit, pastaj do i kalojë SPAK e vendimin e jep GJKKO. Barra e provës bie te kompania private apo zyrtari që ka krijuar kontratën.”

Me këtë rast Basha zbuloi se kishte kontaktuar krerët e agjencive më të specializuara të partnerëve strategjikë të Shqipërisë.

”Kam kontaktuar dhe kam harxhuar ditë të tëra me krerët e agjencive më të specializuara të partnerëve tanë strategjikë. Nuk ka shpëtim, s’kishte shpëtim as Eskobari. Peshqit e mëdhenj jo vetëm do vihen para drejtësisë, por do të kthejnë paratë. Paratë nuk do i gëzojnë. Paratë do kthehen. Kemi draft-ligj anti-mafia. Kemi bashkëpunim me agjencitë më të specializuara.”

Për apelin e Kryeministrit Edi Rama drejtuar naftëtarëve të Ballshit të ndërprejnë grevën e urisë ndryshe nuk ulet me ta që të bisedoj, Kryetari i Partisë Demokratike tha se naftëtarët nuk janë terrorist që mos të pranojë Rama që të dialogojë. Sipas tij, kreu i qeverisë i gënjeu naftëtarët duke iu premtuar 16 rroga.

“Çështja e naftëtarëve është e rëndë. Nuk negociohet me terroristët, por mos të negociosh me naftëtarë? Kjo është absurde. Ai ka dhënë premtim për 16 rroga për ta. Tha; “do vij shumë shpejt aty”. Dhe sot gënjeshtra e pallavra,” tha Kryetari i PD, Lulzim Basha, duke përfunduar:

“Ndaj t’i vërë gishtin kokës se për çdo jetë që është aty, ai është përgjegjës. Në këtë rrethanë, ku është i përfshirë në të gjitha aferat, është dyfish përgjegjës e 3 fish përgjegjës.”