PLATFORMA/ Kriza politike, partitë e vogla me zgjidhje të madhe…
Grupimi i partive të Qendrës së djathtë ka paraqitur sot një platformë për zgjidhjen e krizës politike. Duke i qëndruar besnikë Marrëveshjes së firmosur me Partinë Demokratike për koalicionin opozitar, kryetarët e PR, LZHK, PDK, PAA dhe PBDNJ e shohin të pamundur zhvillimin e zgjedhjeve të 30 Qershorit dhe si zgjidhje vazhdojnë ta shohin krijimin e një qeverie tranzitore pa Edi Ramën Kryeministër për organizimin e zgjedhjeve të parakohshme dhe jo vetëm kaq.
Pesë Ish-Deputetët e Parlamentit e shohin të domosdoshëm ndërtimin e një profili të ri kushtetues dhe mbi të gjitha ndryshimin e sistemit politik.
Pasi ia kërkuan Partisë Demokratike në tryezën e opozitës, grupimi i partive të Qendrës së djathtë ka parashikuar në platformën e tyre ndryshimin e sistemit zgjedhor në vend si dhe kufizim të mandatit për Presidentin e Republikës, Kryeministrin, kryetarët e bashkive etj. Aleatët e djathtë të Partisë Demokratike kërkojnë nisjen e një debati të gjerë për këto ndryshime.
“Nuk duhet të jetë një marrëveshje Basha-Rama, por e politikës shqiptarë, por për një marrëveshje të qëndrueshme dhe jo vetëm për këto zgjedhje,” tha kryetari i Partisë Republikane, Fatmir Mediu.
Ndërkohë kreu i PAA, Agron Duka ishte i prerë:
“Nuk hyjmë në zgjedhje, pasi i quajmë ato farsë, nuk hyjmë pa një qeveri kalimtare dhe tranzitore. Asnjë nuk është i detyruar të jetë në unison për cështje të veçanta, edhe ne kemi qëndrime tona, por ajo që na bashkon është se i quajmë zgjedhjet farë, dhe duam qeveri kalimtare.”
Pas shpalosjes së Platformës, të pyetur nëse Lulzim Basha do të pranojë të ulet në tryezë me Edi Ramën, Aleatët theksojnë:
“Ne kemi folur, dhe i kërkojmë presidentit të vendit të organizojë tryezën, nuk mendoj se përcaktojmë ne kush është kryetari i PS, përfaqësuesit e forcave politike duhet të ulen së bashku për të gjetur një zgjidhje, dhe ky është qëndrimi ynë,” tha kryetari i PR, Fatmir Mediu ndërsa Kryetari i PAA shtoi:
“Opozita së bashku me Bashën kanë një kërkesë, të hyjmë në zgjedhje me qeveri tranzitore, nëse e pranon Rama këtë, të garantoj unë që ulet Basha me Ramën.”
Në fund, Kryetari i LZHK, Dashamir Shehi edhe një herë e bëri të qartë:
“Ne nuk futemi se është djegur afati, u mbyll kjo punë, kemi firmosur një marrëveshje me PD, nuk e duam Ramën kryeministër, edhe kjo punë ka mbaruar. Janë djeg mandatet, edhe zgjedhjet, nuk pranojmë të futemi në zgjedhje. Secila nga partitë ka ide të ndryshme për kodin zgjedhor.”
Para takimit me Presidentin
Platforma për zgjidhjen e krizës politike në vend vjen 24 orë përpara se grupimi i partive të qendrës së djathtë të zhvillojë një takim me Presidentin e Republikës, Ilir Meta.
Kryetarët e PR, LZHK, PDK, PAA dhe PBDNJ kërkuan një tryezë me kreun e shtetit për krizën politike pas takimeve që zhvilluan një javë më parë me Ambasadorin e BE, Luigi Soreca, dhe Ambasadorin e OSBE, Bernd Borchardt.
“Ne do t’i kërkojmë Presidentit të Republikës që të thërrasë një tryezë të pozitës dhe opozitës për të zgjidhur këtë situatë për të garantuar zgjedhje të lira dhe të ndershme. Çdo gjë tjetër do të ishte shkatërruese për vendin. Soreca dhe të gjithë janë në mbështetje të dialogut. Të arrijmë të garantojmë zgjedhje të lira dhe të ndershme dhe përfaqësimin e të gjithë subjekteve politike. Çdo lojë tjetër do të ishte shkatërruese për vendin dhe në këtë moment, ne si forca politike mendojmë se është përgjegjësia jonë që të negociojmë me të gjitha palët dhe institucionet që duhet ta mundësojnë këtë dialog. Kështu kemi vepruar me OSBE-në, ia kërkuam ambasadorit Soreca dhe jemi vlerësues që ai pranoi të diskutojë me ne që të shikojmë një hapësirë për të mbështetur një dialog të vlefshëm për interesat e vendit,” tha Mediu pas takimit.
Plaforma Politike për Krizën
Zgjedhje të lira dhe të ndershme
Krijimi i një qeverie tranzitore
Përgatitja për zgjedhje të parakohshme
Ndryshimi i sistemit zgjedhor
Ndërtimi i një profili të ri kushtetues
Kufizimi i mandateve (Kryeministrit dhe Presidentit)
