Platforma për Dialogun nuk kalon në Parlament

Platforma për Dialogun mbi Marrëveshjen përfundimtare, gjithëpërfshirëse dhe ligjërisht të detyrueshme për normalizimin e marrëdhënieve nuk u miratua në seancën e jashtëzakonshme të Parlamentit të Kosovës .

Parlamenti i Kosovës e ka vënë tri herë në votim Platformën për Dialogun dhe në të tri votimet Platforma nuk kishte shumicën e thjeshtë prej 61 votave.

Ndërkohë është miratuar Projektligji për Detyrat, Përgjegjësitë dhe Kompetencat e Delegacionit Shtetëror të Kosovës në procesin e dialogut me Serbinë.

Deputeti i PSD-së, Dardan Molliqaj, kërkoi nga mazhoranca që ta votojnë me 61 vota për ndryshe tha se PSD-ja nuk e voton.

“Nëse nuk i kemi 61 vota për ne, nuk marrim pjesë në votim,” tha Molliqaj.

Më pas kryetari Kadri Veseli ka kërkuar 15 minuta pushim, duke thirr deputetët që të votojnë.

“Marrim 15 minuta pushim, deri sa të bëhen 61 vota. Unë do ta qes në votim deri sa të bëhen këto vota,” tha Veseli.

Pas këtij votimi Parlamenti shkoi në pushim.

Me kërkesë të deputetit të PDK-së, Memli Krasniqi, Projektligji për Dialogun dhe Platforma janë futur në votim edhe në seancën e re.

Ndryshe, Kryeministri i Kosovës, Ramush Haradinaj tha se ka kërkuar këtë seancë të jashtëzakonshme, pasi bëhet fjalë për tema që kanë rëndësi të madhe.

Ai i ftoi deputetët që të debatojnë për Platformën dhe Projektligjin për dialogun.

“…edhe në fund të arrijmë në një konsensus sepse i është dhënë një mundësi Parlamentit, jo vetëm që ta ruajë pronësinë mbi procesin e dialogut, por edhe të ruajmë Kosovën e 17 shkurtit”, tha Haradinaj.

Deputetët e partive në opozitë, kërkuan mocion procedural, për largimin nga rendi i ditës së Platformës për dialogun, pasi argumentuan se kjo platformë nuk mund të miratohet, sepse bazohet në Ligjin për dialogun, i cili ka kaluar vetëm në lexim të parë në Parlament, raporton RFE.

“LDK propozon që kryeministri ta tërheqë kërkesën dhe ky debat të shtyhet për një ditë tjetër”, tha shefi i Grupit Parlamentar të Lidhjes Demokratike të Kosovës, Avdullah Hoti.

Megjithatë, mocioni procedural për këtë gjë nuk kaloi.

Edhe deputetja e Lëvizjes Vetëvendosje, Albulena Haxhiu tha se tha se pa u miratuar Ligji për dialogun, nuk mund të ketë as aprovim të platformës.

Sipas saj nëse kalon platforma, Vetëvendosje, do ta dërgojë në Gjykatën Kushtetuese për kontestim.

“Absolutisht jo. Ne jemi kundër të dyjave. Me këto forma, këta po mundohen t’i bëjnë nder dhe favore (presidentit të Kosovës) Hashim Thaçit. Ne do t’i kundërshtojmë të dyja. Madje për Projektligjin për dialogun, do ta dërgojmë në Kushtetuese nëse kalon”, tha Haxhiu.

Kurse, deputetët e partive ne pushtet kanë thënë se pavarësisht kundërshtimeve nga deputetëve nga opozita, seanca duhet të vazhdojë pasi që dihet qëndrimi i partive politike opozitare që janë kundër Ligjit dhe Platformës për bisedime.

“Në do ta votonim Projektligjin dhe pas projektligjit do ta votonim Platformën. E drejta e një pjese të opozitës është e padiskutueshme, ata edhe ashtu e kanë të qartë qëndrimin e tyre janë kundër njërës dhe kundër tjetrës”, tha Elmi Reçica nga deputet nga Partia Demokratike e Kosovës.

Zv/kryeministri i Kosovës Fatmir Limaj, i cili është edhe bashkëkryesues i ekipit negociator tha se kjo çështje është e rëndësishme dhe duhet të diskutohen, pasi sipas tij, janë në interes të vendit.

“Procedurat janë të respektuar, çdo vonesë e zvarritje pastaj ka implikime që nuk janë në interes të vendit”, tha Limaj

Në Platformën e prezantuar në Parlamentn thuhet se Kosova pret që procesi i dialogut tё intensifikohet dhe përshpejtohet në vitin 2019 me qëllim të arritjes së një marrëveshje përfundimtare, gjithëpërfshirëse dhe ligjërisht të detyrueshme, ndërmjet Kosovës dhe Serbisë.

Sidoqoftë, edhe në rast se Parlamenti e miraton Ligjin dhe Platformën për dialogun, mbetet e paqartë rifillimi i bisedimeve ndërmjet Kosovës dhe Serbisë, përderisa Prishtina zyrtare e mbanë në fuqi edhe taksën doganore që u ka vendosur importeve nga Serbia dhe Bosnjë e Hercegovina. Që nga nëntori i vitit të kaluar, kur ishte vendosur kjo taksë, Beogradi ka lëshuar bisedimet duke e kushtëzuar kthimin në tavolinë me shfuqizimin e saj.