Plenkoviç: BE duhet t’i kushtojë më shumë vëmendje mungesës së stabilitetit në Ballkan
Liderët e Bashkimit Evropian, BE, duhet t’i kushtojnë më shumë vëmendje mungesës së stabilitetit në Ballkanin Perëndimor, posaçërisht në Bosnje Hercegovinë dhe Serbi, tha sot Kryeministri i Kroacisë, Andrej Pllenkoviq.
“Duhet ta vëzhgojmë gjendjen në Evropën juglindore, posaçërisht stabilitetin e Bosnje e Hercegovinës dhe situatën në Serbi,” tha Andrej Plenkoviç para Samitit të BE-së në Bruksel duke shtuar:
“Ka kaq shumë ngjarje globale për momentin, është koha që një pjesë e asaj vëmendjeje të fokusohet edhe në një rajon që është treguar shumë i ndezshëm gjatë 35 vjetëve të fundit,” tha Kryeministri i Kroacisë duke ju referuar krizës më të rëndë politike në Bosnje që nga përfundimi i luftës së saj 1992-1995, e shkaktuar nga lëvizjet separatiste të Republikës Srpska, pasi lideri i saj, Milorad Dodik, u dënua me një vit burg për shpërfilljen e vendimeve të Përfaqësuesit të Lartë ndërkombëtar.
Plenkoviç gjithashtu iu referua edhe protestave disamujore kundër Qeverisë në Serbi, pas vdekjes së 15 njerëzve nga shembja e një strehe prej betoni në stacionin hekurudhor në Novi Sad në nëntor.
Kryeministri Plenkoviç i komentoi edhe deklaratat e presidentit të Serbisë, Aleksandar Vuçiç, i cili sot tha se Kroacia dhe Shqipëria e kanë hapur një garë armësh duke nënshkruar memorandum për bashkëpunim në mbrojtje me Kosovën.
Sipas televizionit publik kroat, HRT, Kryeministri i Kroacisë tha në Bruksel se e kupton që në Serbi po përpiqen të kërkojnë probleme diku tjetër, por ato nuk janë në memorandumin e bashkëpunimit në fushën e mbrojtjes, e nënshkruar rishtazi mes Kroacisë, Kosovës dhe Shqipërisë.
“Ky është një memorandum për bashkëpunim të përbashkët, nuk ka asnjë karakter armiqësor, kështu që e kuptoj që tani po kërkohen probleme diku tjetër, por në këtë tekst ato nuk ekzistojnë,” tha Andrej Plenkoviç duke iu përgjigjur pyetjes për deklaratën e Presidentit të Serbisë.
Aleksandar Vuçiç tha se memorandumi përbën shkelje të të ashtuquajtures marrëveshje nënrajonale për kontrollin e armatimit nga viti 1996 dhe se është pothuajse i sigurt që për këtë nuk është njoftuar NATO, por Andrej Plenkoviç nguli këmbë se ky memorandum ndihmon përpjekjet e Kosovës dhe Shqipërisë në reformat e tyre dhe shkëmbimin e përvojave./RFE/
