Po monitorojmë veprimet e liderëve, Ambasadorja e SHBA: Askush s’është mbi ligjin!
Ambasadorja e SHBA në Tiranë, Yuri Kim, tha sot se ata që shkelin ligjin dhe pengojnë të drejtën e qytetarëve për të votuar të lirë dhe në paqe duhet të ndiqen plotësisht, askush nuk është mbi ligjin. Ky mesazh i qartë është dhënë gjatë takimeve me Prokurorin e Përgjithshëm Olsian Çela, Drejtorin e Policisë, Ardi Veliu, dhe kreun e SPAK, Arben Kraja, ndërsa pas takimit me kryetarin e KQZ, Ilirian Celibashi, kishte mesazh edhe për liderët politik të cilëve u tha qartë se janë duke monitoruar të gjitha veprimet e tyre.
“Unë u takova me Prokurorin e Përgjithshëm Çela tani, do të takohem së shpejti me shefin e SPAK, Kraja, u takova dje me Drejtorin e Përgjithshëm të Policisë Veliu. Mesazhi i Shteteve të Bashkuara të Amerikës: Ata që shkelin ligjin dhe pengojnë të drejtën e qytetarëve për të votuar të lirë dhe në paqe duhet të ndiqen plotësisht. Asnjë trajtim i veçantë. Pa përjashtime. Askush nuk është mbi ligjin,” u shpreh përmes rrjetit social Twitter pas takimit me Prokurorin e Përgjithshëm, Ambasadorja amerikae Yuri Kim.
Në fund, Ambasadorja Yuri Kim u takua edhe me kreun e Komisionit Shtetëror të Zgjedhjeve, Ilirjan Celibashi, kur dhe ju bëri thirrje udhëheqësve të politikës shqiptare, që të sigurojnë një proces të qetë zgjedhor më 25 prill ndërsa e bëri të qartë se SHBA është duke i monitoruar.
“Të gjithë jemi të shqetësuar nga lajmi i asaj që ka ndodhur dje. E rëndësishme që shkelësit të kapen, përgjegjësit të ndëshkohen, pa përjashtim. Nuk ka asnjë trajtim të vecantë për askënd. Sikurse e kanë theksuar shumë persona zgjedhjet e 25 prillit kanë lidhje me të ardhmen, jo me të shkuarën. Gjëra të tilla të tmerrshme, sikurse kanë qenë grupet e paautroizuara për mbrojtjen e votës, është e rëndësishme që gjëra të tilla të mbeten pas, në të shkuarën. Është e papranueshme për një vend të NATO-s dhe që do të anëtarësohet në BE. Është përgjegjësi e udhëheqësve që të bëjnë thirrje për qetësi dhe të mos ketë nxitje për asnjë gjë tjetër që nuk ka lidhje me qetësinë,” tha Yuri Kim duke përfunduar:
“Jemi duke monitoruar të gjitha veprimet e drejtuesve të vendit. Falenderoj kryeministrin Rama dhe kreun e PD Lulzim Basha që kanë bërë thirrje për qetësi, të mos pranohet dhuna dhe të mund të votohet më 25 prill. Më lejoni të theksoj, tu drejtohem votuesve, ju nuk jeni vetëm, ne jemi me ju.”
