Podgoricë, policia ndalon marshimin opozitar serb kundër Projektligjit për komunitetet fetare

Policia malazeze ka bllokuar sot qendrën e Podgoricës për të ndaluar protestat nga opozita serbe kundër një ligji të propozuar për pronat dhe komunitetet fetare.

Dhjetëra zyrtarë policorë kanë vënë barriera metalike në kryeqytetin e Malit të Zi, teksa parlamenti ka nisur debatin për këtë projektligj.

Policia tha se ata kanë ndaluar një marshim opozitar sepse nuk është njoftuar në kohë të duhur. Në pamundësi për të marshuar para parlamentit, qindra persona janë mbledhur para kishës, raporton RFE.

Projektligji përcakton që komunitet fetare duhet të prezantojnë të dhënat për pronësinë e pronave të tyre prej para vitit 1918, kur Mali i Zi i është bashkuar Mbretërisë SKS, raporton Agjencia e lajmeve AP.

Kisha Ortodokse Serbe tha se ligji do t’i pamundësojë kësaj Kishe të zotërojë pronat që ka, duke përfshirë manastirët dhe kishat.

Qeveria në anën tjetër ka mohuar këtë pretendim.

Përmes një deklarate, Kisha Ortodokse Serbe në Malin e Zi ka bërë thirrje për qetësi dhe ka thënë se do të ankohet në organizata ndërkombëtare për shkak të asaj që ka quajtuar “kërcënim brutal të lirive fetare në Malin e Zi”.

Mali i Zi ka rreth 620.000 banorë dhe shumica prej tyre i përkasin fesë ortodokse, derisa kisha tashmë është e ndarë, në atë të Malit të Zi dhe Kishën Ortodokse e cila kontrollohet nga Serbia.