Podujevë, përurohet shtatorja e Ish-Presidentit Ibrahim Rugova
Ibrahim Rugova ishte njeri i dijes, shpresës, udhëheqës i madh e vizionar i pashoq, tha Presidentja e Kosovës, Vjosa Osmani, në 34-vjetorin e shpalljes së Kushtetutës së Kaçanikut, në Podujevë, ku u përurua shtatorja e Ish-Presidentit të Kosovës, Ibrahim Rugova, e ku ishin prezent dhe Kryeministri Albin Kurti, familja e presidentit historik Ibrahim Rugova, ministra, deputetë, kryetari i Komunës Shpejtim Bulliqi e shumë qytetarë të tjerë.
“Në ditët më të errëta të historisë sonë ai qëndroi i palëkundur me vizionin e tij të pavarësisë. Në ditët më të errëta ai dëshmoi se forca e kombit tonë është përbashkimi dhe vullneti i pathyeshëm për liri, paqe, demokraci dhe pavarësi,” tha Vjosa Osmani duke shtuar se Rugova ndërtoi ura besimi me liderët anembanë globit, që janë bërë shtylla që qëndron shteti ynë.
“Shtatorja e Rugovës duhet të shërbejë si kujtesë për një Kosovë që nderon, ruan e kultivon aleancat me miq dhe përqafon të ardhmen me të njëjtën forcë shpirtërore të cilën e mishëroi presidenti Rugova,” tha Vjosa Osmani.
Kryetari i Komunës së Podujevës, Shpejtim Bulliqi, foli për njeriun që me qëndresë dhe vizion e udhëhoqi Kosovën drejt pavarësisë.
“Ky monument që tani do të qëndrojë në parkun e qytetit të Podujevës, është një përkujtim i përjetshëm, për njeriun që me urtësi, qëndresë dhe vizion e udhëhoqi Kosovën drejt lirisë dhe pavarësisë.”
Ndërsa Ish-Presidenti i Kosovës, Fatmir Sejdiu, shtoi:
“Nën udhëheqjen e tij projekti për shtetin e pavarur dhe sovran të Kosovës mbështetur mbi parimet e mëdha të cilat ishin edhe parime të Lidhjes Demokratike të Kosovës të cilën e udhëhoqi, e që ishin liri, pavarësi dhe demokraci, arriti të krijojë mirëkuptimin e gjithë botës demokratike dhe të qytetëruar.”
Në emër të familjes së Presidentit Ibrahim Rugova, foli i biri, Ukë Rugova, i cili falënderoi Komunën e Podujevës për financimin e kësaj shtatoreje.
“Zoti le të vazhdojë ta bekojë Republikën e Kosovës dhe popullin e saj të mrkullueshëm bashkë me Shtetet e Bashkuara të Amerikës dhe Bashkësinë Evropiane,” tha Ukë Rugova.
