Policia arreston dy spiunë serbë

Policia e Kosovës ka arrestuar dy serbë nën dyshimet për “spiunim”. Lajmin e ka konfirmuar për RFE, zëdhënësi i policisë së Kosovës, Daut Hoxha.

Arrestimi i të dyshuarve është bërë dje, në pikën kufitare te Dheut i Bardhë.

“Arrestimi është bërë gjatë kontrollit të një automjeti e tipit Ford Galaxy, të cilin e drejtonte personi i dyshuar mashkull/serb (i lindur në vitin 1959) dhe së bashku me të, si pasagjer ndodhej edhe personi tjetër, poashtu i dyshuar, mashkull/serb ( i lindur ne vitin 1978),” thekson Zëdhënësi Hoxha duke sqaruar se pas vlerësimit të informacioneve dhe dokumenteve të gjetura tek personat e dyshuar, është njoftuar prokurori i shtetit:

“Pas konsultimeve të nevojshme dy të dyshuarit janë arrestuar dhe ndaj tyre është inicuar rasti si “spiunazh” konform Kodit Penal të Republikës së Kosovës.”

Me vendim të prokurorit, dy të dyshuarit janë dërguar në mbajtje.

Policia nuk ka dhënë më shumë detaje për rastin.