Policia dhe Prokuroria japin detaje për operacionin në Mitrovicë

Policia e Kosovës ka dhënë detaje të operacionit në Mitrovicë ku janë arrestuar tre persona në lidhje me vrasjen e Oliver Ivanoviçit.

Në një konferencë të jashtëzakonshme për media drejtori i Departamentit për Hetime, Riza Shillova, ka sqaruar se sot në mëngjes Policia ka  arrestuar tre persona, ndërsa njëri nuk është gjetur në shtëpinë e tij.

“Cak kanë qenë katër lokacione. Në këtë operacion kanë marrë pjesë njësi te ndryshme policore. Operacioni ka rezultuar të jetë i suksesshëm. Gjate operacionit nuk kemi pasur asnjë person të lënduar. Gjithçka ka shkuar sipas planifikimit. Të dyshuarit janë në objektet e Policisë dhe do të procedohet në bazë të urdhrave që i jep prokurori”, tha Shillova.

Prokurori i Prokurorisë Speciale Sylë Hoxha, tha se veprimet e sotme kanë ardhur si rezultat i shterjes të të gjitha mënyrave tjera për të arritur tek të dhënat faktike.

Ai ka mohuar që aksioni i sotëm i policisë të Kosovë të ketë lidhje me taksën e vendosur nga Qeveria e për produktet e Serbisë që importohen në vend.

Për epilogun e këtij rasti, Hoxha tha se qytetarët do të njoftohen me kohë.

“Nga 13 marsi Prokuroria e Kosovës ka grumbulluar prova. Sigurisht se ka pasur vështirësi. Po ashtu kemi dëgjuar mbi 40 dëshmitar ë kryesisht nga pjesa veriore lidhur me rastin e Oliver Ivanoviç. Ju njoftoj se Prokuroria Speciale  ka grumbulluar prova dhe ka ardhur në përfundim se vetëm me bastisjen e shtëpive mund të sigurojë prova të tjera për rastin e Oliver Ivanoviçit.  Siç u tha edhe nga ana e Policisë, përveç urdhrit që e kanë zbatuar me përpikëri, Policia ka qenë e obliguar të arrestojë edhe një person tjetër i cili i ka penguar gjatë detyrës. Gjatë bastisjes dhe arrestimit të këtyre personave, gjatë punës në teren nuk është  arritur të arrestohet edhe një person S.A., i cili mund të arrestohet çdo moment”, tha Hoxha.

Ai nuk ka dashur të bëjë të ditur nëse personi me inicialet M.R. është Milan Radojçiq, për shkak të ndjeshmërisë së rastit dhe hetimeve.

Zëdhënësi i Policisë Baki Kelani tha se i kanë njoftimet për protestën e paralajmëruar në orën 12 në Graqanicë, për kundërshtimin e taksës prej 100 përqind.

“Policia e Kosovës është e gatshme për ruajtjen e sigurisë publike. Do të jemi të kujdesshëm që të veprojmë si duhet për të ruajtur qetësinë”, tha ai