Policia e Kosovës arreston 16 të dyshuar për kontrabandë me armë, përfshirë një zyrtar policor

Policia e Kosovës ka arrestuar sot 16 të dyshuar, përfshirë një zyrtar policor, për kontrabandë me armë.

Pas një operacioni të gjerë policor, Policia e Kosovës dhe Prokuroria Themelore e Mitrovicës përmes një komunikate njoftuan se operacioni policor u krye në 21 lokacione në Mitrovicën e Jugut, Mitrovicën e Veriut, Vushtrri, Skenderaj dhe Leposaviç.

Gjatë operacionit janë sekuestruar 9 armë zjarri, 200 fishekë, municione të ndryshme, 15 celularë, dy palë pranga, thikë, tyta të armës, këllëf për armë dhe një DVR, thuhet në njoftim.

Operacioni vjen pas hetimeve disamujore dhe u krye nga Drejtoria për Hetimin e Krimit të Organizuar dhe Krimeve të Rënda, me mbështetjen e njësive policore dhe Inspektoratit Policor të Kosovës.

Të arrestuarit dyshohen për kryerjen e veprave penale “detyrim”, si dhe “importim, eksportim, furnizim, transportim, prodhim, këmbim, ndërmjetësimi ose shitje të paautorizuar të armëve apo materieve plasëse”.

Zv/Drejtori i Policisë së Kosovës për veriun, Veton Elshani, tha për RFE se në mesin e të arrestuarve është dhe një zyrtar policor, i cili është pezulluar gjatë arrestimit.

“Polici është pezulluar përkohësisht gjatë arrestimit, deri në përfundimin e hetimeve. Nëse është i pafajshëm, do të kthehet në punë,” tha Veton Elshani, duke mos dhënë më shumë detaje.

RFE mëson se polici i arrestuar është nga radhët e komunitetit serb. Ndërkohë 13 nga 16 të arrestuarit janë dërguar në paraburgim për 48 orë, thuhet në njoftim. Identiteti i të dyshuarve të tjerë nuk është bërë i ditur.

Autoritetet e sigurisë nuk dhanë më shumë detaje se nga cilat vende apo se në cilat vende mund të kenë importuar dhe eksportuar armë të dyshuarit, raporton RFE.

Ndryshe, në të kaluarën, Policia e Kosovës ka gjetur dhe konfiskuar armatim, veçanërisht në veri.