Policia e Kosovës mbyll zyrën paralele tatimore të Serbisë në veri

Pas një bastisje mëngjesin e sotëm, Policia e Kosovës ka mbyllur zyrën paralele tatimore në veri, e cila funksiononte si degë e Ministrisë së Financave të Serbisë.

Këtë e ka konfirmuar Zv/Drejtori  i Policisë për rajonin e veriut të Mitrovicës, Veton Elshani.

“Rreth orës 9 kemi hy në këtë ndërtesë e cila sipas informacioneve tona ka funksionuar si zyre tatimore, si degë e  Ministrisë së Financave të Serbisë. Në këtë vend kemi has në prova që e vërtetojnë dyshimin tonë dhe pas konsultimit me Prokuror, njerëzit që janë has aty janë largu nga ai vend dhe ajo ndërtesë është mbyll deri në verifikim të plotë të fakteve,” tha Veton Elshani.

Rasti është duke u hetuar si falsifikim i dokumenteve, tha Zv/Drejtori  i Policisë për rajonin e veriut të Mitrovicës, Veton Elshani, ndërsa konfirmoi se nuk ka persona të arrestuar.

Me përfundimin e këtij aksioni ka reaguar dhe ministri i Brendshëm i Kosovës, Xhelal Sveçla:

“Ky insitucion ka mbledhur ilegalisht mjete financiare nga qytetarë e subjekte që jetojnë e veprojnë në Republikën e Kosovës,” tha Xhelal Sveçla në reagimin e tij përmes rrjetit social Facebook duke e shoqëruar dhe me një video ndërsa përfundoi:

“Haraçi është i dënueshëm dhe rreptësisht i ndaluar për këdo që e zhvillon atë. E në këtë rast, ai zhvillohej nga grupe kriminale lojale ndaj Serbisë agresore dhe figurave si Vladimir Putin.”