Policia e Shkodrës në gjunjë/ Basha drejtorit të Policisë: Lufto krimin ose ik!

Dhe, deri sa ministri i Brendshëm, Fatmir Xhafaj hamendëson se kur duhet goditur bandat e krimit, në shtator apo tetor, kryetari i Partisë Demokratike, Lulzim Basha i ka bërë të qartë njeriut për të cilin Edi Rama thotë se është ministër i brendshëm, se sot në gjunjë është edhe policia e Shkodrës.

Në situatën e krijuar, Basha i bëri thirrje drejtorit të policisë së qarkut të Shkodrës, meqë nuk guxon të mobilizoj Policinë e Shtetit kundër kriminelëve, por i shoqëron ata me blinda dhe furgonë policie, që të japë dorëheqjen nga detyra, pasi në të kundërt, tha ai, do të jetë përgjegjës si Edi Rama dhe Fatmir Xhafaj.

“Në gjunjë është edhe policia e Shkodrës. Sot kam një thirrje për drejtorin e qarkut të Shkodrës; jep dorëheqjen dhe largohu menjëherë për ndryshe do të jesh njësoj përgjegjës si Edi Rama dhe Fatmir Xhafaj për këtë gjendje. Në qoftë se nuk ta mban të thuash të vërtetën, nëse nuk guxon të mobilizosh Policinë e Shtetit kundër kriminelëve, përkundrazi i shoqëron ata me blinda dhe furgonë policie, atëherë e vetmja që të shpëton nga përgjegjësia morale dhe penale është largimi yt dhe i çdo oficeri tjetër që nuk zbaton dot ligjin dhe nuk shtyp dot krimin për një arsye të thjeshtë sepse krimi ua ka marrë kalanë nga brenda”.

Ndryshe, kreu i Policisë së Shkodrës aktualisht është Vehbi Bushati.