Policia e Shtetit nuk ekziston më, PD: Tani është Policia Private e Partisë Socialiste!
Pjesëmarrja e Sekretarit të Përgjithshëm të Partisë Socialiste, Taulant Balla, në një aktivitet policor në Elbasan, bashkë me gjithë drejtuesit e partisë lokale, për Partinë Demokratike konfirmoi sot se Policia e Shtetit nuk ekziston më. Tani ajo është Policia Private e Partisë Socialiste.
“Në grahmat e fundit të pushtetit, ata po e bëjnë gati policinë ta përdorin për fushatën elektorale për llogari të Edi Ramës. Pjesëmarrja e Taulant Ballës është edhe një mesazh i dëshpëruar për krimit, duke e shfaqur veten si shpëtimtarin e çunave problematik,” thekson në reagimin e saj Partia Demokratike përmes Ish-Deputetit Endri Hasa duke dhënë dhe lajmin e keq:
“Lajmi i keq është se policia po keqpërdoret si polici private zgjedhjesh, që nuk i shërben qytetarëve por një partie politike,” tha Endri Hasa megjithëse kishte dhe lajm të mirë:
“Lajmi i mirë është se kanë mbetur vetëm 7 muaj nga shkrirja në një e policisë, e krimit dhe e partisë shtet.”
Ndryshe, sot me rastin e prezantimit të forcave “Shqiponja” në Elbasan ishte dhe Sekretari i Përgjithshëm i PS Taulant Balla përveç ministrit të Brendshëm, Sandër Lleshaj, i cili u mor mediat edhe pse nuk u pyet fare.
Kur ministri Lleshaj u pyet nëse do të vazhdoj të qëndroj në detyrë edhe pas atentatit të mbrëshëm në qendër të Tiranë, Balla tha se ai ka bërë dhe bën një punë të shkëlqyer ndërsa ngjarje kriminale si ajo mbrëmë ndodhin në çdo kryeqytet të botës dhe se policia do t’i zbulojë autorët.
“…hedh dikush një gurë në lumë dhe të gjithë të mençurit e tjerë duhet ta ndjekin. Ministri Lleshaj prej ditës së parë në krye të ministrisë së Brendshme ka bërë dhe bën një punë të shkëlqyer dhe padyshim ky është një investim i rëndësishëm i besimit që PS dhe grupi parlamentar i saj i ka dhënë. Ndaj do ju lutesha miqësisht të fokusohuni tek ajo që ndodhi sot në Elbasan që është një rritje e prezencës së prekshme të punës së policisë në shërbim të njerëzve të zakonshëm të Elbasanit,” tha Taulant Balla me mburrje se duke filluar prej sot Elbasani do të ketë dhe forcat “Shqiponja”.
