Policia konfirmon arrestimin e çekëve, me dron dhe pankarta kundër Kosovës

Policia e Kosovës ka konfirmuar sot arrestimin e tetë personave me shtetësi çeke të cilët dyshohen se kishin planifikuar të fusnin mesazhe përmes dronit në stadiumin “Fadil Vokrri” gjatë ndeshjes Kosovë-Çeki.

“Mbrëmë rreth orës 20:00 në rrugën Shtërpcë-Prevallë nga njësitet policore janë ndaluar dy vetura me targa të Republikës së Çekisë. Gjatë kontrollimit në automjete janë gjetur një pankartë me mbishkrim “Kosovo je Srbsko”, një flamur i Serbisë me mbishkrim “Nema predaje”, 6 thika, 2 radiolidhje,1 shufër hekuri dhe një dron,” thekson Policia e Kosovës duke saktësuar se tetë shtetasi çekë janë shoqëruar në Stacionin policor në Ferizaj për intervistim dhe verifikimin e qëllimit të ardhjes së tyre në Kosovë.

“Pas konsultimit me Prokurorin e Shtetit, me urdhër të tij , janë konfiskuar përkohësisht dokumentet e udhëtimit si dhe të gjitha pajisjet e gjetura tek ta dhe të njëjtit janë liruar në procedurë të rregullt,” thuhet në njoftimin e policisë.

Nga njësiti i migrimit, thekson Policia e Kosovës, personave ju është dorëzuar ftesa zyrtare që sot të paraqiten në këtë njësi për procedura të mëtutjeshme.