Policia konfirmon incidentin me armë zjarri në veri
Policia e Kosovës tha se në Bistricë të Leposaviçit ka shtënë me armë zjarri drejt një makine, pasi ajo nuk është ndalur për kontroll. Ndërkaq, sipas Zyrës për Kosovën në Qeverinë serbe nga ky incident ka mbetur i plagosur një serb.
Sipas një njoftimi për media, makina gjatë lëvizjes ka goditur automjetin e Policisë së Kosovës, duke “rrezikuar drejtpërdrejt edhe jetën zyrtarëve policorë, të cilët për të neutralizuar rrezikun ndaj tyre kanë shtënë me armë zjarri”, raporton RFE.
Autoritetet e rendit thanë se të dyshuarit janë larguar nga vendi i ngjarjes, ndërkaq përveç hetimeve për rastin, Policia e Kosovës ka njoftuar edhe Inspektoratin Policor për procedura të mëtejme.
Më herët gjatë ditës së sotme, drejtori i Zyrës për Kosovë në Qeverinë serbe, Petar Petkoviç deklaroi se i plagosuri M.D. është transportuar me urgjencë në spitalin e Kralevës. Sipas tij, njësitë policore të Kosovës “kanë qëlluar” automjetin “vetëm sepse nuk kanë dashur të lejojnë që policia t’i keqtrajtojë pa asnjë bazë dhe arsye”.
Sipas Petkoviçit, i plagosuri “është qëlluar në pjesën e majtë të kraharorit dhe ka plagë me armë zjarri”.
Petar Petkoviç, raporton RFE, tha se në makinën, që po qarkullonte në magjistralen Mitrovicë-Leposaviç, përveç M.D, ishte edhe D.S, i komunitetit serb, i cili nuk ka pësuar lëndime.
Ndërkohë Policia e Kosovës njofton se personat e dyshuar të përfshirë në këtë rast kanë të kaluar kriminale dhe kanë qenë të përfshirë në dhjetëra veprave penale dhe kundërvajtje.
D.S., 32-vjeçar, sipas PK-së, dyshohet se është i përfshirë në mbi 80 vepra penale si “vrasje, detyrim, armëmbajtje pa leje, sulm, pengim i personit zyrtar gjatë kryerjes së detyrës zyrtare, kanosje, vjedhje e rëndë, shkaktim i rrezikut të përgjithshëm, grabitje”, si dhe i njëjti ka kryer edhe mbi 20 kundërvajtje.
Ndërsa M.D., 38-vjeçar, dyshohet se është i përfshirë në 17 vepra penale si “vrasje, shtrëngim, armëmbajtje pa leje, vjedhje e rëndë, lëndim i rëndë trupor, kalim i paautorizuar i kufirit, manipulim me prova”, dhe ka kryer edhe tri kundërvajtje, nofton Policia e Kosovës.
