Policia maqedonase ndalon 45 migrantë afër kufirit me Serbinë

Policia në Maqedoninë e Veriut thekson se ka ndaluar 45 migrantë në një furgon afër kufirit me Serbinë, si dhe ka arrestuar ngasësin e mjetit, nën dyshimin e kontrabandimit me njerëz.

Në një komunikatë të policisë maqedonase, thuhet se 42 migrantë janë pakistanezë, dy afganë dhe një sirian. Ata janë parë duke u larguar nga furgoni afër kufirit, raporton Agjencia e lajmeve, The Associated Press.

Migrantët besohet se kanë hyrë në këtë shtet ilegalisht nga Greqia dhe kanë paguar kontrabanduesit për t’i dërguar në Serbi, që më pas të kalojnë kufirin për të arritur në ndonjë vend të Bashkimit Evropian.

Policia tha se këta persona janë dërguar në një kamp në Gjevgjeli, në pritje të dëbimit në Greqi, raporton RFE.

Zyrtarët policorë po ashtu kanë thënë se kanë ndaluar 10.017 migrantë që kanë hyrë ilegalisht në këtë shtet në gjysmën e parë të këtij viti.