Policia nuk toleron, Rama: Nesër në 5 të mëngjesit do të rihapet qarkullimi!

Kryeministri Edi Rama ka falënderuar sot të gjithë ata që kanë zbatuar masat e vendosura nga qeveria për parandalimin e përhapjes së koronavirusit, ndërsa e bëri të qartë se nesër në 5 të mëngjesit do të rihapet qarkullimi për ata që shkojnë në punë dhe deri në orën 13 të drekës do të kenë plot 8 orë për të bërë pazar. 

“Miq përshëndetje! Policia e Shtetit informon se sot nuk ka pasur, deri tani asnjë këmbë njeriu në rrugë në të gjithë territorin e Republikës së Shqipërisë. Natyrisht asnjë përveç forcave të rendit, të ushtrisë, të operacionit humanitar që vijon pa u ndalur në ndihmë të të gjithë atyre që janë më shumë se gjithë të tjerët në nevojë. Mirënjohje të gjithëve ju, pa dallim feje, krahine, ideje që mbyllur brenda shtëpisë po e pengoni përparimin e armikut dhe jepni një kontribut të jashtëzakonshëm në këtë luftë ku mbarë njerëzimi sot për sot ka vetëm një armë, rezistencën e durimit popullor. Dua t’ju informoj se deri dje kemi mundur të ndihmojmë 14 428 familje më në nevojë. 11089 familje me ndihma ushqimore; 1203 familje me ndihmë mjekësore, barna dhe asistencë shëndetësore në shtëpi dhe 2136 të tjera për nevoja të tjera urgjente. Do të vazhdojmë pa pushim ditë për ditë, të trokasim në dyert e pensionistëve të vetmuar, në dyert e familjeve me probleme të mëdha ekonomike, në dyert e familjeve të prekura nga tërmeti që s’kanë as derë sepse jetojnë ende në çadra. Do të bëjmë gjithçka që të mos u mungojë ushqimi bazë, medikamentet e nevojshme dhe çdo ndihmë urgjence.”

Nuk e kishte duke e parë veten në pasqyre, por foli për ata që flasin pa lidhje, ku përveç kritikëve protagonisti kryesor jo vetë gjatë këtyre ditëve është vetë ai:

“Disa prej jush, të cilëve vesi i keq i të folurit pa lidhje, virusi i keq i të parit mbrapsht apo zakoni i keq i mllefit politik nuk iu ndahen as në këtë kohë kolere nuk rrinë dot pa e treguar veten, duke shkruar komente të ulëta, të turpshme për ata të cilët nuk rrinë si gjithë të tjerët në shtëpi por janë rrugëve që t’iu shërbejnë njerëzve në nevojë.

Shohin videot nga operacioni humanitar dhe flasin për show. Po çfarë show, ju martë e mira ju martë, çfarë show?! E keni mësuar gabim dhe e përdorni këtë fjalë për të përqeshur informacionin që ju jepet nga fronte të ndryshme të punës. Flasin për vjedhje ndihmash e selektivitet po ku e patë ju martë e mira vjedhjen nga shtëpia apo me satelitët e mendjes mbrapsht apo me dylbitë e syve që nuk duan të shohin. Po flasin për popullin që po vdes për bukë, për cilin popull e kanë fjalët kur vetë janë të ulur në shtëpi dhe luajnë me iPhone duke u ankuar deri dje masivisht se po u mbaronte interneti. Ja ku më keni mua më shani e më kërrdisni sa të doni por respektojini ata që po shkojnë shtëpi më shtëpi, njerëzit e FA-ve dhe të shërbimeve sociale të shtetit dhe të bashkive të cilë nuk ju kanë asnjë borxh që të lexojnë pisllëqe dhe gromësira gojësh të këqija në komentet e operacionit humanitar kur ai postohet përmes videove. Ne po bëjmë gjithçka dimë dhe gjithçka mundemi. Po bëjmë të pamundurën dhe do ta bëjmë deri në fund. Nuk duam as medalje as lëvdata sepse kjo është detyra jonë. Por ama në këtë kohë të mallkuar duhet solidaritet, respekt, mirënjohje për mijëra ushtarë në front të parë, që nga mjekët e infermierët që po përballen me armikun në trupin e të sëmurëve deri tek ushtarakët dhe punonjësit që po ndihmojnë më të dobëtit, më të varfrit dhe pensionistët e vetmuar të përballojnë vështirësitë ekstra në këtë luftë për mbijetesë.”

Në fund u kujtua të sqaroj atë presin shqiptarët, regjimin e lëvizjes:

“Nesër në 5 të mëngjesit do të rihapet qarkullimi për ata që do të shkojnë në punë dhe deri në 13:00 do të keni të gjithë plot 8 orë për të bërë pazar. Shoh që ankoheni për oraret. Keq kur ishin dy oraret, keq tani me një orar më të zgjatur. Por me sa duket nuk po kuptohemi akoma. Këto orare nuk janë as për qejf as për komoditetin e njerëzve por janë orare të imponuara nga nevoja për përballimin e një lufte, një lufte e madhe si kjo që kërcënon të na marrë mijëra njerëz me vete. Nuk e kuptoj ça lidhje kanë oraret me rrëmujën nëpër tregje dhe me mosrespektimin e rregullit që të mos dalim në rrugë të shoqëruar, të mos rrimë në një vend, po të lëvizim, të ecim, të mbarojmë punë dhe të kthehemi në shtëpi. Të mbajmë radhë në rresht, në vijë të drejtë, njeri pas tjetrit, të durojmë, të presim deri sa të mbarojmë punë.

Disa thonë të mbyllemi për 2 javë pa dalë fare asnjëri, por për të ngrënë si do ia bëjmë nëse nuk kemi mundësi të bëjmë pazar, të paktën një herë në dy ditë. Pse të mos zbatojmë rregullat, pse të mos jemi rigorozë në këtë luftë dhe si të mos na mjaftojnë 8 orë për të blerë bukën dhe ushqimet e tjera, medikamentet ata që kanë nevojë dhe për t’u kthyer në shtëpi. Nuk duam të zgjohemi herët që në 5-6-7 të mëngjesit dhe duam të turremi të tërë në orën 10 e 12 nëpër tregje, dyqane, kjo nuk shkon fare dhe ne nuk do ta lejojmë.”