Policia publikon Planin e Masave, Ambasada e SHBA: Kujdes!
Policia e Tiranës përmes nje njoftimi ka publikuar planin e masave për Protesën Kombëtare të opozitës që do të mbahet duke filluar në orën 12:00 para Kryeministrisë ndërkohë Ambasada e SHBA ka paralajmëruar qytetarët e saj të kenë kujdes.
Policia njofton se duke filluar nga ora 06:00 nuk do të lejohet parkimi i automjeteve, në rrugët: Bulevardi “Dëshmorët e Kombit”, sheshi “Nënë Tereza”, rruga “Ismail Qemali”, nga kryqëzimi i rrugës së Elbasanit me rrugën “Ibrahim Rugova”, rruga “Papa Gjon Pali II”, bulevardi “Zhan D’Ark” dhe bulevardi “Bajram Curri”, nga kryqëzimi i rrugës së Elbasanit me rrugën “Ibrahim Rugova”.
Gjithashtu, në këto rrugë, do të bllokohet qarkullimi i automjeteve, nga ora 10:00 deri në përfundim të tubimit, thekson policia ku mësohet se janë mobilizuar mbi 1.100 forca të policisë, duke nisur nga ato të rendit, FNSH dhe Garda e Republikës.
Ndërkohë edhe ambasada amerikane ka paralajmëruar qytetarët e saj që të kenë kujdës ditën e sotme.
“Në Bulevardin Dëshmorët e Kombit, përballë Kryeministrisë është planifikuar të zhvillohet një protestë. Kjo protestë ka potencialin të përhapet në rrugët përreth duke shkaktuar bllokime të trafikut, devijime dhe mbyllje të rrugëve.
Qytetarët amerikanë këshillohen të shmangin tubimet e mëdha. Ndërsa shumë ngjarje të mëdha zhvillohen në mënyrë paqësore, disa situata mund të ndryshojnë shpejt dhe në mënyrë të paparashikueshme. Monitoroni mediat lokale dhe ndiqni udhëzimet e autoriteteve lokale të zbatimit të ligjit për informacionin më të fundit,” thuhet në mesazhin e Ambasadës së SHBA në Tiranë.
