Policia që vret!
nga Agim Popoci
Policia e Shtetit ka për mision ruajtjen e rendit e të sigurisë publike, ruajtjen e personaliteteve të larta shtetërore dhe objekteve të rëndësisë së veçantë, garantimin e zbatimit të ligjit, në përputhje me Kushtetutën dhe aktet ndërkombëtare, duke respektuar të drejtat dhe liritë e njeriut. Ky është misioni i policisë sipas Ligjit për Policinë e Shtetit të cilin është e qartë se nuk e ka lexuar polici që vrau Klodianin 25 vjeçar pse theu orën policore, por nga ardhja në pushtet ky Ligj nuk i interesoi edhe atyre që e nxitën këtë policë vrasës me fjalorin dhe sjelljen e tyre kriminale, Kryeministrit Edi Rama dhe Ministrit të Brendshëm, Ish-Gjeneral Sandër Lleshajt!
Deri më sot Edi Rama me policët e tij tërhoqi zvarrë dhe i rrahu, i ngopi me gaz lotsjellës dhe arrestoi ata rivalë politik që guxuan ti kundërshtojnë politikat e tij kriminale! Kishte prej tyre që duartrokitën në emër të ruajtjes së rendit dhe sigurisë publike ku nuk mungoi as Ish-Gjeneral Sandër Lleshaj i cili mburrej me helmimin e gjysmës së Tiranës për një grusht protestuesish opozitar!
Deri më sot Edi Rama me policët e tij tërhoqi zvarrë të gjithë ata që guxuan të shesin fruta e perime jashtë tregjeve të Lali Erit, madje i bënë për vdekje edhe ata që morën guximin të tregtojnë kokoshka! Kishte prej atyre që duartrokitën në emër të ruajtjes së rendit dhe sigurisë publike ashtu si dhe Lali Erin, por tërheqja zvarrë e plakave që shesin majdanoz dhe pleqve që tregtojnë kokoshka nuk la shije të mirë tek shumica e popullsisë.
Por Edi Rama nuk u ndal, po i konsumohej mandati i dytë dhe oreksi për mandatin e tretë filloi ti gëlontet në stomak! Erdhi pandemia, e mësoi lojën me Aktet Normative dhe i dha shkelmin e fundit edhe karrierës së tij, siç është tashmë e qartë edhe nga zelli i madh antligjor. Miratonte Akte Normative, lëshonte urdhra nga Facebooku dhe përplaste popullin me policin pa i interesuar se cili është misioni i Policisë së Shtetit.
Dhe, në kohë pandemie policët filluan të tërheqin zvarrë të moshuarit pa lejedalje nga Kryeministri kur ata ishin duke blerë edhe bukë. Patjetër që edhe në këto raste kishte nga ata që mbështesnin terrorin e Edi Ramës, por radhët e atyre që ishin kundër këtij brutaliteti policor po shtoheshin.
Asnjë akt, ama as edhe një akt human, asnjë polic nuk e kreu gjatë këtij kalvari dhune e terrori sepse kështu nuk e kishte urdhëruar Kryeministri!
Rasti i fundit me maskat, sikur ti kemi parasysh të gjitha rreziqet dhe qëllimet e mira të Kryeministrit për mbrojtjen e shëndetit, nuk e justifikon dhunën që përdor Policia e Shtetit ndaj një njeriu pa maskë. Por askush nuk i tha policisë mos përdor dhunë madje nuk u bë asnjë fushatë senzibilizimi as për qytetarët pse duhet vendosin maskën para se Xhaxhi Polici të hakërrehet me pranga në duar; Sepse thjeshtë kjo nuk është as mënyra e qeverisjes së Edi Ramës, as strategjia e realizimit të misionit nga Policia e Shtetit, e cila tashmë është mësuar të kërkoj gjak në asfalt! Kjo, dhe i ra kokës!
25 vjeçari fatkeq, Klodian Rasha, nuk e ka menduar se shkelja e orës policore në lagjen e tij mund të dënohet me vdekje nga Policia e Shtetit! Në fakt, ky akt kriminal edhe nuk do të ndodhte sikur Policia të ishte e Shtetit, por për fat të keq të Klodianit dhe popullit shqiptar, Policia është e Edi Ramës!
Si e tillë, Policia e Shtetit mund ti pëlqej për momentin Kryeministrit Edi Rama dhe Ish-Gjeneralit Sandër Lleshaj ndërsa shohin rivalët politik duke u tërhequr zvarrë, por vrasja ndryshon shumë gjëra! Dhe, ngatërron po aq kur vetë Policia e Shtetit gënjen edhe kur vret!
Nëse Policia e Shtetit nuk kujdeset për ruajtjen e rendit e të sigurisë publike, garantimin e zbatimit të ligjit, në përputhje me Kushtetutën dhe aktet ndërkombëtare, duke respektuar të drejtat dhe liritë e njeriut, por vret, ajo është e dënuar të vras edhe regjimin që mbanë në këmbë!
Policinë që vret, shqiptarët e kanë parë për 45 vjet dhe jo vetëm, por kanë parë dhe policët që morën dhenë pa ju interesuar nëse në krye të shtetit ishte Enver Hoxha apo Ramiza Ali. “Poshtë komunizmi”, “Poshtë diktatura” dhe “Hiqini kapelet” nuk janë thirrje që u dëgjuan vetëm sonte nga zemërimi popullor në historinë e këti populli. Këtë duhet ta ketë parasysh edhe Edi Rama dhe të mos shoh përralla me sy hapur për mandatin e tretë, kur nuk bëhet më fjalë për zemërim të rivalëve politik të cilin e ka manipuluar nga momenti i parë që hyri në politik.
Kujdes! Bëhet fjalë për zemërim popullor!
