Policia: Situata e sigurisë në rrugët tona shumë shqetësuese

Me gjithë angazhimet, masat e vazhdueshme operacionale, duke përfshirë edhe fushatat senzibilizuese dhe apelet për një kujdes për siguri më të madhe në trafik, Policia e Kosovës duke ju referuar statistikave të 24 orëve të fundit ku janë evidentuar dy aksidente me fatalitet, thekson se situata e sigurisë në rrugët tona mbetet ende shqetësuese.

“Aksidentet në përgjithësi e sidomos humbja e jetëve njerëzore në aksidente trafiku është shqetësuese jo vetëm për policinë, por edhe për institucionet tjera dhe qytetarët në përgjithësi, prandaj kërkohet dhe apelojmë për një përkushtim dhe qasje më gjithëpërfshirëse proaktive, për një gjendje më të mirë”, thuhet në njoftimin e Policisë së Kosovës duke shtuar se me njësitet e saj po vazhdon të monitorojë dhe të menaxhojë situatën në trafikun rrugor nëpër të gjitha rrugët e vendit dhe aty ku pjesëmarrësit bien ndesh me rregullat në trafik.

“Masa ndëshkuese ligjore do të aplikohen me qëllim të parandalimit të rasteve të aksidenteve në veçanti atyre me fatalitet që po paraqesin shqetësim për të gjithë dhe po shkaktojnë humbje të jetëve njerëzore”, përfundon apeli i Policisë së Kosovës.