Policinë e Ish-Gjeneral Lleshajt nuk e shqetësojnë krimet, por Facebooku i Berishës!
Ndonëse opinioni publik informohen nga profili në Facebook i Ish-Presidentit Sali Berisha, si për krimet ashtu edhe arrestimet që kryen Policia e Shtetit, kjo e fundit, e shqetësuar për rrjedhën e informacioneve që përfundojnë tek postimet e Ish-Presidentit, dhe duke e pranuar se është nën presionin e pandërprerë të, siç e quan ajo, lum shpifjesh nga ana e këtij shtetasi, Policia e Shtetit kërcënon me kallzime penale:
“Policia e Shtetit bën me dije se do të reagojë me kallzime penale, duke kërkuar zbardhjen shpejt dhe deri në fund të këtyre shpifjeve, nga Prokuroria,” thekson Policia e Shtetit në reagimin e saj përmes rrjetit social Facebook, duke i quajtur publikimet e këtij lloji, tentim për ndërtimin e një fushate të mirëfilltë linçimi publik, me qëllim denigrimin, delegjitimimin, dekurajimin dhe pengimin e punës së Policisë.
Ndryshe, pas publikimeve të shumta të Ish-Presidentit Sali Berisha si për vrasjet, korrupsionin dhe nepotizmin në administratë, trafikun ndërkombëtar të drogës dhe arrestimeve të shumta që rezultuan të vërteta, denoncimi i fundit për vrasjen e avokatit të Shullazit, ku akuzohen strukturat e shtetit, ishte pika që mbushi gotën e denoncimeve të Sali Berishës, që tashmë është shqetësim serioz i Qeverisë së Edi Ramës.
Reagim i PSH për akuzat dhe shpifjet e shtetasit Sali Berisha
Policia e Shtetit konstaton me keqardhje se shtetasi Sali Berisha ka prodhuar dhe postuar në rrjete sociale në vazhdimësi shpifje të panumërta ndaj kësaj organizate ligj zbatuese.
E gjendur nën presionin e pandërprerë të një lumi shpifjesh nga ana e këtij shtetasi, Policia e Shtetit bën me dije se do të reagojë me kallzime penale, duke kërkuar zbardhjen shpejt dhe deri në fund të këtyre shpifjeve, nga Prokuroria.
Publikimet e këtij lloji tentojnë të ndërtojnë një fushatë të mirëfilltë linçimi publik, që ka qëllim të denigrojnë, delegjitimojnë, dekurajojnë dhe pengojnë punën e trupës së Policisë së Shtetit në shërbim të Kushtetutës, ligjit e qytetarëve.
Policia e Shtetit do ta adresojë në rrugë ligjore këtë tentativë të papranueshme dhe do të mirëpresë hetimet që do të provojnë bazën e çdo akuze nga ana e z.Berisha. Kjo është e rëndësishme jo vetëm në respekt të opinionit publik, por dhe për vetë Policinë e Shtetit.
