“Politikat progresive – përgjigje ndaj sfidave të vendeve të Ballkanit Perëndimor”, Albin Kurti sot në Shkup 

“Politikat progresive – përgjigje ndaj sfidave të vendeve të Ballkanit Perëndimor” është konfereca që mbahet sot në Hamam Daut Pasha në Shkup, organizuar nga Fondacioni Friedrich Ebert, ku pjesë e panelit do jetë dhe Kryeministri i Kosovës, Albin Kurti.

Ndërkohë Ministria e Brendshme e Maqedonisë së Veriut ka paralajmëruar regjim të posaçëm të trafikut në rajonin më të gjerë të qendrës së qytetit të Shkupit

“Me rastin e vizitës së paralajmëruar të kryetarit të Qeverisë së Republikës së Kosovës, Albin Kurti, Njësiti për Siguri në Komunikacionin Rrugor pranë SPB Shkup do të ndërmerr masa për regjim të posaçëm të trafikut nëpër rrugët në rajonin më të gjerë të qendrës së qytetit të Shkupit,” thekson Ministria e Punëve të Brendshme e Maqedonisë së Veriut.

Ndryshe, përveç Albin Kurtit pjesë e panelit të konferencës së organizuar nga Fondacioni Friedrich Ebert do të jenë edhe kryetari i Partisë Socialdemokrate të Gjermanisë, Lars Klingbeil, kryetari i LSDM-së, Dimitar Kovaçevski, Nënkryetarja e Partisë Demokratike të Serbisë, Dragana Rakiç, lideri i Partisë për Liri dhe Drejtësi, Dragan Gjilas, kryetari i Partisë Socialdemokrate të Malit të Zi, Ivan Vujoviç, dhe Nënkryetari i Partisë Demokratike të Socialistëve të Malit të Zi, Ivan Vukoviç.