Politikë dhe Argëtim: Berlinalja 2026

Edicioni i sivjetshëm i Festivalit Ndërkombëtar të Filmit në Berlin u hap me një film afgan. Për çmimet më të larta të festivalit, Ariun e Artë dhe Ariun e Argjendtë konkurrojnë 22 filma nga e gjithë bota.

Në Berlin nisi edicioni i 76-të i Festivalit Ndërkombëtar të Filmit. Berlinalja u hap me dramën afgane “No Good Men”. Ngjarjet e filmit të tretë artistik të regjisores Shahrbanoo Sadat, e cila është vlerësuar me disa çmime, zhvillohen në prag të ofensivës së talibanëve në vitin 2021 dhe rrëfen historinë e një kameramaneje në një redaksi lajmesh televizive, e cila është e zhgënjyer nga mungesa e partnerëve të mundshëm interesantë në shoqërinë thellësisht patriarkale të vendit të saj.

Filmi ndërthur një temë politike me komedi romantike, duke mishëruar kështu dy tipare karakteristike të Berlinales: historikisht ajo konsiderohet si festivali më politik ndër tri festivalet e mëdha evropiane të filmit, krahas Kanës dhe Venecias, dhe njëkohësisht është edhe një magnet për publikun, një nga festivalet më të mëdha të filmit në botë me numrin më të lartë të spektatorëve. Berlinalja e vitit të kaluar vendosi një rekord të ri me 336.000 bileta të shitura.

Larmi e madhe zhanresh

Drejtoresha e festivalit, Tricia Tuttle, deklaroi për DW se Berlinalja “nuk ka frikë të promovojë dhe të mbështesë filma politikë, filma që mund të nxisin diskutime të vështira”, por theksoi se më shumë se 200 filmat e programit të sivjetshëm karakterizohen nga një larmi e madhe zhanresh, nga filmat horror te komeditë romantike e deri te veprat eksperimentale.

Tuttle është e mendimit se “çdo lloj kinemaje është në njëfarë mënyre politike, edhe kur bëhet fjalë për një këndvështrim më intim dhe personal, përmes të cilit shihen çështje kulturore dhe shoqërore në botë”. Megjithatë ajo nënvizon se Berlinalja synon gjithashtu të mbështesë industrinë e filmit, e cila po përballet me vështirësi, duke tërhequr një publik më të gjerë në kinema. Për këtë arsye shumë filma në program janë edhe “thjesht argëtime eskapiste që ofrojnë kënaqësi”.

Gara për Ariun e Artë

Për çmimet më të larta të festivalit, Ariun e Artë dhe Ariun e Argjendtë konkurrojnë 22 filma nga e gjithë bota.

Ndër filmat më të diskutuar në garë është “Rosebush Pruning”, me regji të Karim Ainouz, ku në rolet kryesore luajnë Callum Turner, Riley Keough, Jamie Bell, Elle Fanning dhe Pamela Anderson. Drejtoresha e festivalit, Tricia Tuttle, e përshkruan filmin si një “thriller të ndërlikuar për një familje të privilegjuar që shpërbëhet kur dalin në dritë sekrete të errëta ”.

Amy Adams, e nominuar gjashtë herë për Oscar, luan në filmin “At the Sea” të regjisorit Kornél Mundruczó rolin e një ish-balerine që, pas një kure rehabilitimi, nis një jetë të re pa alkool.

Në veprën “Josephine” të Beth de Araújo, e cila fitoi Çmimin e Madh të Jurisë në Festivalin e Filmit Sundance në janar, Channing Tatum dhe Gemma Chan interpretojnë prindërit e një vajze tetëvjeçare që bëhet dëshmitare e një sulmi seksual.

Aktorja franceze Juliette Binoche luan përkrah Tom Courtenay, Anna Calder-Marshall dhe Florence Hunt në filmin “Queen at Sea” të Lance Hammer, një vepër që trajton ndikimin e demencës në një familje.

Rupert Grint (i njohur për rolin e Ron Weasley në filmat “Harry Potter”) dhe aktorja finlandeze Seidi Haarla interpretojnë një çift të ri prindërish që jetojnë në një pyll skandinav në filmin horror-fantazi “Nightborn”.

Fituesit e Ariut të Artë dhe Ariut të Argjendtë, që do të shpallen më 21 shkurt, do të përzgjidhen nga një juri e kryesuar nga regjisori i njohur gjerman Wim Wenders.

Talentet e reja

Krahas garës kryesore Berlinalja nderon me çmime të ndryshme edhe talente të tjera. Në seksionin “Perspectives” konkurrojnë 14 filma “debutime në film artistik”. Kjo garë u krijua vitin e kaluar si pjesë e risive të prezantuara nga Tricia Tuttle në vitin e saj të parë si drejtoreshë e Berlinales.

“Festivalet luajnë një rol jashtëzakonisht të rëndësishëm për zbulimin e brezit të ardhshëm të talenteve të mëdha”, tha Tuttle për DW. Ajo theksoi se si publiku edhe profesionistët u entuziazmuan vitin e kaluar nga konkursi i të rinjve dhe tha se edhe programi i këtij viti sjell “talente mbresëlënëse dhe filma plot zemër e kreativitet mahnitës”, një arsye, shtoi ajo, “për t’u gëzuar për të ardhmen”.

Krahas risive Berlinalja vazhdon edhe me traditën, ku bën pjesë edhe çmimi Teddy Award, i cili këtë vit feston 40-vjetorin e tij. Me këtë çmim nderohen vepra që trajtojnë tema LGBTQ+. Berlinalja ishte pararojë e inkuadrimit të kësaj kategorie filmash në festival./DW/