Pompeo: Ka prova se virusi doli nga laboratori kinez
Sekretari amerikan i Shtetit, Mike Pompeo, tha se ekziston një numër i konsiderueshëm i provave që dëshmojnë se koronavirusi doli nga një laborator kinez. Sidoqoftë, Pompeo nuk e kontestoi vlerësimin e agjencive të inteligjencës amerikane që virusi nuk ishte i krijuar nga njeriu.
Si Pompeo, ashtu edhe Presidenti i SHBA, Donald Trump, kanë kritikuar ashpër Kinën, duke akuzuar për mungesë të transparencës.
“Ka një sasi të konsiderueshme të provave që virusi doli nga ai laboratori në Wuhan,” tha Mike Pompeo për televizionin amerikan ABC.
Koronavirusi i ri u paraqit për herë të parë në Kinë në fund të vitit të kaluar. Deri më tani nga sëmundja COVID-19 që e shkakton koronavirusi kanë vdekur më shumë se 247.000 njerëz në të gjithë botën, përfshirë më shumë se 67.000 në Shtetet e Bashkuara.
“Ekspertët më të mirë deri më tani, duket se mendojnë se ishte bërë nga njeriu. Unë nuk kam asnjë arsye të mos besoj se në këtë pikë,” tha Pompeo.
Kur u pyet lidhur me vlerësimin e Agjencive të inteligjencës amerikane, se virusi nuk është bërë nga njeriu, Pompeo shtoi: “Unë e kam parë atë që ka thënë komuniteti i inteligjencës. Nuk kam asnjë arsye të besoj se ata kanë gabuar.”
Raporti i 30 prillit nga zyra e Drejtorit të Inteligjencës Kombëtare thoshte se pajtohej me konsensusin e gjerë shkencor se sëmundja nuk ishte e krijuar nga njeriu.
Pompeo akuzoi Kinën për bllokimin e hyrjes së hetuesve ndërkombëtarë në laboratorët kinezë.
“Ne po mundohemi të dërgojmë një ekip atje, Organizata Botërore e Shëndetësisë po përpiqet të ketë një ekip atje,” tha Pompeo duke shtuar: “Askush nuk lejohet të shkojë në këtë laborator [Vuhan] ose ndonjë laborator tjetër”.
Departamenti i Shtetit, raporton RFE, nuk iu përgjigj menjëherë një kërkese për sqarim të komenteve të Pompeos.
Kina i ka mohuar akuzat duke thënë se SHBA nuk kishte asnjë provë që virusi doli nga laboratori në Wuhan.
Më 30 prill, Presidenti Trump u shpreh i sigurt se virusi mund të ketë origjinën në një laborator kinez të virologjisë, por ai nuk pranoi të paraqesë më shumë detaje.
Disa zyrtarë amerikanë, kanë thënë se besojnë se virusi ose u është transmetuar tek njerëzit përmes kontaktit me kafshët e egra në një treg mishi në Vuhan, ose mund të dalë aksidentalisht nga një prej dy laboratorëve në Vuhan që besohet të jenë të përfshirë në kërkimet civile për rreziqet e mundshme biologjike.
