Porositë për 6 marsin dhe Presidentin e ri, Rama: Jo mitingje, jo grumbullime por punë kokë më kokë…

Dekreti i Presidentit të Republikës për zgjedhjet e pjesshme vendore në 6 bashki, sot Kryeministri Edi Rama tha para Grupit Parlamentar të PS se është shfaqur papritur, dhe për këto zgjedhje ai akuzoi Ilir Metën, Lulzim Bashën dhe Sali Berishën.

“Një objektiv i ri afatshkurtër është shfaqur papritur para nesh me nxjerrjen e dekreteve presidenciale për zgjedhjet e pjesshme vendore në 6 bashki pas një periudhe të gjatë shkeljeje dhe shtypjeje të Kushtetutës nga ana e zotërisë, i cili e mban institucionin e Kreut të Shtetit peng të hënës së tij, edhe për pak kohë fatmirësisht. Ne do ta përmbushim me seriozitet detyrimin tonë për të garuar që në këto 6 njësi vendore të zgjidhen kandidatët e PS. Për fushatën do të organizohemi sa më mirë, por pa lënë pas dore asnjë angazhim tjetër dhe duke mos e humbur fokusin nga këshillimi kombëtar në gjithë territorin e vendit. Sepse këshillimi kombëtar është dhe një shtysë që gjithë deputetit të kthehen tek njerëzit,” tha Edi Rama para Grupit Parlamentar duke kërkuar sa më pak politikë, pasi më nuk i duhet kur nuk ka opozitë.

“Mesazhet tona duhet të jenë të lidhura thuajse tërësisht me hallet, me problemet dhe me shpresat e komuniteteve vendore të këtyre bashkive. Ndërkohë që sa më pak politikë në këto zgjedhje, aq më mirë, pasi politikisht panorama e këtyre zgjedhjeve është e qartë. Nga njëra anë ne me ofertën tonë të punës për komunitetin, nga ana tjetër kundërshtarët tanë politikë, në 6 sheshe, për 12 ose 18 përsheshe, varet si do rreshtohen. Po 12 minimumi, 18 e mundshme, edhe më shumë mbase. Nga njëra anë ne, 6 kandidatë, të cilët do të ofrojnë një mundësi zgjedhjeje të bazuar tek puna konkrete, nga ana tjetër ata me 12, 18 ose më shumë që do të luftojnë për mbijetesën politike të 2-3 udhëheqësve partiakë këtu në Tiranë dhe që s’kanë asnjë lidhje me këto zgjedhje në vetvete.

Nga njëra anë ne, këta që jemi me të mirat, me të metat tona, në një garë për të punuar më shumë, më mirë, për Shkodrën, për Durrësin, për Dibrën, për Vorën, për Lushnjën dhe Rrogozhinën.

Nga ana tjetër ata me bravat, varetë, trastat me dekorata, të gjithë kundër të gjithëve, për të provuar forcat mes tyre në kurriz të atyre bashkive dhe hipur mbi shpinën e anëtarësive të këtyre partive. Dy PD, njëra më e madhe se tjetra dhe një tjetër parti, më e madhe se të dyja bashkë, ngjitur me të madhen e të trejave. Tre lider, njëri grata, tjetri non grata, i treti të dyja bashkë edhe grata dhe non grata. Tre popuj nga mbrapa tyre,” tha Rama i bindur për fitore më 6 Mars ndërsa dha direktiva për fushatën që do të bëjnë socialistetë për kë to zgjedhje të pjesshme:

“Populli i 11 dhjetorit, poulli i 18 dhjetorit dhe populli i 2 marsit, që merr jetë mes të parit dhe të dytit. Kjo është oferta për demokratët dhe demokratet, dhe ata që e quajnë veten pjesë të tyre, ndërkohë që populli shqiptar është i qartë për gjithçka sheh. Dhe në emër të këtyre 2 popujve do thirren në 6 fushata të gjithë bravaxhinjtë, qysqinxhinjtë dhe trastagjintë, për t’i kërcyer mbi kurriz njëri tjetrit. Si në atë lojën e vjetër, në oborret e shkollave ‘ rraqe rraqe kiko sa gishta janë këto’. Ndërsa rraqet do hidhen mbi njëra tjetrën duke i kthyer 6 bashkitë në rraqe, duhet të shohim punën tonë. Jo mitingje, jo grumbullime masive në salla të mbyllura, por punë kokë më kokë me njerëzit, për të treguar më kokën lart çfarë kemi bërë mirë dhe me kokën ulur çfarë duhet të korrigjojmë Ku ishin qysh se mbaruan zgjedhjet, jo të gjithë janë njësoj, një pjesë kanë vijuar të mbajnë kontakte por një pjesë tjetër duhet t’i shfrytëzojnë këto kontakte.“

Para Grupit Parlamentar, Kryetari i PS, Edi Rama, në fjalën e tij rreth sfidave të këtij viti të ri politik foli edhe për zgjedhjen e Presidentit të ri të Republikës ku me dy PD, sipas tij, do ti takoj Partisë Socialiste ta zgjedhë Presidentin.

“Na duhet të zgjedhim presidentin dhe do ta zgjedhë ky grup parlamentar, në radhë të parë. Komplikimi i skajshëm me krijimin e dy PD, na e bën të vështirë të gjejmë adresën se ku ta kërkojmë dialogun, me opozitën parlamentare, por ndërkohë ne duhet të mendojmë për mënyrën se si mund të këshillohemi me qytetarët edhe për këtë vendimmarrje. Në një mënyrë apo në një tjetër duhet të gjejmë mënyrën për mbledhur opinionin e njerëzve lidhur me figurën e presidentit të Republikës. Pas një serie personazhesh që e kanë degraduar figurën e presidentit, ne kemi përgjegjësinë e madhe qytetare, politike e kushtetuese, që t’i japim popullit shqiptar në krye të shtetit një njeri normal.

Një kryetar shteti që t’i kthejë normalitetin njerëzor, moral e institucional zyrës së Presidentit. Nuk do të bjerë nga qielli, me siguri do të gjendet mes nesh, këtu në territorin e Republikës së Shqipërisë, apo në territorin shpirtëror të kombit tonë, se mund të jetë dhe jashtë kufijve, por e kemi detyrim t’i japim asaj zyre që për pesë vitet e ardhshme të ketë një njeri normal, një qytetar normal, një figurë moralisht dhe profesionalisht normale. Prandaj, do ju lutesha të gjithëve të mendojmë në këtë sens dhe cilido që ka një ide lidhur me sesi mund të organizohemi në këtë drejtim t’i ndajë me drejtuesit e grupit,” tha Kryeministri Edi Rama duke ushtruar në fund edhe demokracinë para Grupit Parlamentar ndërsa paralajmëroj dhe një këshillim me qytetarët në lidhje me mënyrën e përzgjedhjes së Presidentit:

“Mund të organizojmë në vijim edhe një bashkëbisedim se si mund të përfshijmë edhe qytetarët për këtë!”