Porti i Barit, sekuestrohen 225.000 paund, destinacion kishin Shqipërinë!

Në Portin e Barit janë sekuestruar 225.000 £ që kishin si destinacion Shqipërinë. Mësohet se paratë u gjetën në një furgon me targa angleze, ndërkohë që mjeti do të imbarokohej në traget.

Guardia di Finanza me zyrtarët e Agjencisë së Doganave dhe Monopoleve sekuestroi sasinë e parave, në vlerën e afërsisht 250 mijë euro, raporton Agjencia italiane e lajmeve “Ansa” duke saktësuar se paratë ishin mbështjellë me mbrojtëse plastike, të futura në furgon, ndërkohë që ishte e nevojshme ndërhyrja e një mekaniku të specializuar.

Drejtuesi i furgonit, ideniteti i të cilit nuk bëhet i ditur, raporton BW, akuzohet se nuk ka deklaruar në kufi këtë shumë parash, ndërkohë që u sanksionua me sekuestrimin e 50% të shumës, me vlerë në total rreth 120 mijë euro.