Porti i ri i Durrësit, PD: Depozituam në Gjykatën Kushtetuese padinë kundër mega-aferës korruptive

Partia Demokratike ka depozituar sot në Gjykatën Kushtetuese padinë kundër Marrëveshjes për Portin e ri të Durrësit, duke theksuar se nuk mundet që mega-afera më e madhe korruptive të jetë simboli i mënyrës së qeverisjes, PD këtë nuk do e lejojë.

Pas depozitimit të padisë, Nënkryetari i PD, Oerd Bylykbashi, foli për një grabitje të pasurisë publike për interesa private, nën petkun e investitorëve strategjik, por me kompani offshore, fakt të cilin Partia Demokratike e godet në Gjykatën Kushtetuese

“Siç e kishim premtuar PD depozitoi në Gjykatën Kushtetuese padinë kundër mega-aferës korruptive, për marrëveshjen e Portit të Durrësit. Një grabitje të tillë të pasurisë publike për interesa private, nën petkun e investitorëve strategjik, por me kompani offshore, pikërisht këtë ne e godasim në Gjykatën Kushtetuese, shpresojmë që gjykata do qëndrojë në nivelin që pritet dhe të bëjë detyrën e saj,” tha Nënkryetari i Partisë Demokratike, Oerd Bylykbashi, pas depozitimit të kësaj mega-afere koruptive në Gjykatën Kushtetuese duke shtuar:

“E gjitha kjo është histori që bazohet te Rama. Porti i Durrësit është aset i të gjithë shqiptarëve. Është atje dhe ka qenë atje si themel, nuk mund t’ju merret qytetarëve. Nuk mundet që mega-afera më e madhe korruptive të jetë simboli i mënyrës së qeverisjes. PD këtë nuk do e lejojë”.