Prag proteste/ Frikë, Rama grave të Beratit: Mos i leni burrat të ikin në Tiranë…

Ndonëse mbledhi mijëra pjesëtarë të administratës për ti dëshmuar opinionit publik se sa i adhuruar që është, një ditë para protestës së Opozitës së Bashkuar, kryeministri Edi Rama dukshëm i frikësuar e ul nivelin e bisedës me gallatat që bënë me Pandeli Majkon me veteranët e lindur pas luftës së dytë botërore.  

Kur ishte në opozitë, të vetmin mjet që përdorte për përmbysjen e qeverisë si brenda ashtu edhe jashtë Parlamentit ishte dhuna, dhe sot tha nga Berati se “budallallëqe të tilla kishin marrë fund”. Fol poshtë e lartë se askush nuk i shkon pas liderit të Opozitës së Bashkuar, Lulzim Basha, dhe përmes mediave që ka në shërbim mundohet të bindë opinionin për këto që thotë, por sot i luti gratë beratase që të mos i lënë burrat që të shkojnë nesër në protestë në Tiranë.

“Unë u bëj thirrje grave të Beratit ti kapin burrat prej xhakete dhe mos i lënë të ikin në Tiranë. Se sebeb duan. Se thonë hajde të dalim të shohin çfarë do bëhet nga Tirana. Nuk do të bëhet asgjë. Me metoda të tilla e vetmja gjë që nuk preket, është qeveria. Nuk kanë çfarë i bëjnë fare qeverisë, por kanë çfarë i bëjnë vetes,” tha Edi Rama ndërsa i fliste rilindasve të përzgjedhur të Qarkut të Beratit duke e pasur të qartë se edhe ata mund të kenë shumë arsye për të protestuar në Tiranë. Dhe jo vetëm kaq!

Pikërisht këtyre sejmenëve që i kishte para dhe kur ishte në opozitë i urdhëronte të djegin gjithçka që shohin para kryeministrisë kur të vijnë në Tiranë, sot u tha se kjo dëmton vetëm qytetarët dhe biznesin e tyre, sepse qeveria nuk ndryshohet me dhunë:

“Thirrjet për ndryshimin e qeverisë me dhunë i ka parë Shqipëria dhe kujtuam se nuk do bëheshin më budallallëqe të kësaj natyre. E vetmja gjë që nuk preket është qeveria. Nuk preket dot. Përkundrazi po të ishte për qeverinë dhe shumicën në parlament, as nuk t’i hynim fare këtij muhabeti dhe këtyre rreziqeve. Por preket Shqipëria, sepse shfaqet si një vend ku nuk duhet shkuar për të investuar dhe për ta vizituar. Pra preket çdo familje dhe çdo individ që jeton në Berat.

Nëse urën për të ardhur këtu e kalojnë më pak vizitor, ka më pak para që qarkullojnë këtu dhe më pak para për ata që ndërtojnë biznese të vogla apo bujtina. Pra ka më pak lekë që shkojnë në shtëpitë e tyre. Ata që nisen nga Berati apo çdo qytet tjetër për të shkuar pas Berihait, por duhet të kuptojnë se nuk kanë çfarë ti bëjnë qeverisë dhe as qeverisjes socialiste, por kanë ç’i bëjnë vetes. I bien vetes sepse mbyll tjetri dyqanin dhe shkon pas Berihait në Tiranë. Ai dyqani shet më shumë kur vijnë vizitore këtu.”

Dhe, derisa Opozita e Bashkuar edhe një ditë para Protestës së Madhe vazhdon të përsëris kërkesën për pjesëmarrje në zgjedhje pa Edi Ramën kryeministër, Kryeministri foli në Berat për garën përballë PD dhe LSI, ku tha se do të fitojë të gjitha bashkitë në zgjedhjet e 30 Qershorit:

“Unë them do hyjnë, edhe po nuk hynë ne i kemi ndarë gjërat, Luli me Monikën, dhe Monika me Lulin, ne me njerëzit, njerëzit me ne!”

Në fund, që Edi Rama ka frikë nga protesta e 16 Marsit, këtë e ka shprehur edhe me refuzimin që policia e Ish-Gjeneral Sandër Lleshajt i bëri kërkesës së Opozitës së Bashkuar për protestë, si për kohën pa afat ashtu edhe vendin ku do të zhvillohet protesta.

Ndryshe, mediat e afërta me Kryeministrin Edi Rama theksojnë se Policia e Tiranës i ka refuzuar lejen opozitës për të protestuar nesër përpara kryeministrisë me argumentin që të specifikohet orari se kur do të mbyllet tubimi; Dhe, kërkesa e PD për protestën në 4 rrugët që rrethojnë Kryeministrinë, pra,  Bulevardi “Dëshmorët e Kombit”, lulishtja te Piramida dhe te rruga “Ismail Qemali” në krah të Kryeministrisë, policia e Tiranës refuzimin e argumentoi se hapësira tek “Lulishtja tek Piramida” dhe te rruga “Ismail Qemali” do të jetë territor ku do të dislokohen shërbimet e policisë dhe të Gardës së Republikës.