Pranimi i emigrantëve, Qeveria e Kosovës e gatshme të bashkëpunojë me SHBA-në

Qeveria në detyrë e Kosovës ka shprehur gatishmërinë për të bashkëpunuar me Shtetet e Bashkuara për pranimin dhe zhvendosjen e përkohshme të shtetasve të vendeve të treta në Kosovë.

“Në përgjigje të kërkesës nga Shtetet e Bashkuara lidhur me pranimin dhe zhvendosjen e përkohshme të shtetasve të vendeve të treta, ne kemi shprehur gatishmërinë tonë për të bashkëpunuar me Shtetet e Bashkuara në trajtimin e kësaj çështjeje, në përputhje me kushtet e përcaktuara,” tha zëdhënësi i Qeverisë në detyrë, Përparim Kryeziu.

Përgjatë një periudhe njëvjeçare, deri në pesëdhjetë persona mund të zhvendosen përkohësisht, me qëllim të lehtësimit të kthimit të tyre të sigurt në vendin e prejardhjes, sqaroi zëdhënësi i Qeverisë në detyrë.

“Qeveria ka shprehur gatishmërinë që të angazhohet, me mundësinë për të përzgjedhur individë nga një listë e propozuar, për aq sa ata i plotësojnë kriteret e caktuara lidhur me sundimin e ligjit dhe rendin publik. Më shumë informacione do të mund të japim ndërkohë,” tha zëdhënësi i Qeverisë në detyrë, Përparim Kryeziu, duke shtuar se Shtetet e Bashkuara mbeten një aleat i palëkundur i Republikës së Kosovës ndërsa përfundoi:

“Partneriteti ynë i ndërsjellë, i ndërtuar ndër dekada, mbështetet në vlera të përbashkëta dhe bashkëpunim. E vlerësojmë lart mbështetjen e tyre, sidomos në rrugëtimin tonë drejt integrimit në institucionet euroatlantike.”