Prap kundër KPK/ ONM rekomandon shkarkimin e një gjyqtari “të pastër”. Ja emri…
Operacioni Ndërkombëtar i Monitorimit, ONM, i ka rekomanduar sot Komisionerëve Publikë që të ankimojnë në Kolegjin e Posaçëm të Apelimit vendimin e Komisionit të Pavarur të Kualifikimit për konfirmimin në detyrë të gjyqtarit Gentian Medja.
“Sot, më datë 9. 8. 2018, Operacioni Ndërkombëtar i Monitorimit u ka paraqitur Komisionerëve Publikë rekomandimin për ta ankimuar në Kolegjin e Posaçëm të Apelimit vendimin e Komisionit të Pavarur të Kualifikimit për konfirmimin në detyrë të z. Gentian Medja”.
Pas zbardhjes së vendimit nga KPK, pritet që Komisionerët Publikë ta shqyrtojnë këtë vendim krahas rekomandimit të Operacionit Ndërkombëtar të Monitorimit.
“Bazuar në pikën 7, të nenit 55, të ligjit nr. 84/2016, ‘Për rivlerësimin kalimtar të gjyqtarëve dhe prokurorëve në Republikën e Shqipërisë’, Komisioni i Pavarur i Kualifikimit ka 30 ditë afat për t’ia njoftuar vendimin me shkrim Komisionerëve Publikë”, sqaron ONM, ndërkohë mësohet se ky vendim ende nuk ka mbërritur në duart e Komisionerëve Publikë.
Operacioni Ndërkombëtar i Monitorimit, më tej sqaron procedimin ligjor të këitj ankimimi.
“Bazuar në pikën 1, të nenit 63, të ligjit nr. 84/2016, ‘Për rivlerësimin kalimtar të gjyqtarëve dhe prokurorëve në Republikën e Shqipërisë’, Komisionerët Publikë, brenda 15 ditëve nga data e njoftimit të vendimit nga Komisioni i Pavarur i Kualifikimit, kanë të drejtë të paraqesin ankim pranë Kolegjit të Posaçëm të Apelimit”.
Ndryshe, sipas ONM-së, në datë 1. 8. 2018, në përfundim të seancës dëgjimore përkatëse, Komisioni i Pavarur i Kualifikimit vendosi konfirmimin në detyrë të subjektit të rivlerësimit, z. Gentian Medja, magjistrat/gjyqtar në Gjykatën Administrative, Shkalla e Parë, Tiranë, dhe anëtar i Këshillit të Emërimeve në Drejtësi.
