Premtimi/ Kurti në Kaçanik, një të punësuar për çdo familje

Kryetari për Kryeministër i Lëvizjes Vetëvendosje, Albin Kurti, duke theksuar se pas 6 tetorit do të thyhet krimi, papunësia dhe varfëri, ai premtoi në Kaçanik që përmes punësimit sezonal do të punësojnë nga një anëtar të çdo familje, që janë në skemën sociale.

“Me grantin e katërt për komunat në vlerë të gjithëmbarshme prej 600 milionë euro, ne do të investojmë në infrastrukturën dhe ekonominë e Kaçanikut, në ujësjellës, kanalizime, në rrugë e në ndriçim, në parqe e në sheshe. Erdhi dita për komunën, erdhi drita për komunën e Kaçanikut. Erdhi dita që të kujdesemi për ata që kanë nevojë për kujdesin e shtetit. Në një vend me kaq shumë varfëri, zor se mund të ketë njëmend demokraci. Ne jemi për demokraci. Në Kaçanik sot janë mbi 800 familje me mbi 3 mijë anëtar të varur nga ndihma sociale, që i ofron veçse 80 cent në ditë. Për vete i morën fabrikat, fitimin e prodhimin, e juve ua lanë skamjen e mjerimin. Por, skema jonë e punësimit sezonal do të garantojë një të punësuar për çdo familje që është në skemë sociale.”

Kandidati për Kryeministër i Lëvizjes Vetëvendosje tha se erdhi dita, për:

“Më shumë çerdhe për fëmijët e pavarësi për prindërit, duke ndarë shtesat për fëmijët në llogari të nënave, gratë i ruajnë paret më mirë. Pra, 240 euro në vit për fëmijët nën 2 vjeç, e 120 euro për fëmijët deri në 16 vjeç, në xhirollogari të nënës. Të gjitha familjet që kanë të ardhura të ulëta, do të rimbursohen deri në 150 euro, varësisht prej të ardhurave vjetore që marrin si familje dhe kjo për secilin fëmijë nga një shumë të tillë.”